Publiká riba 29 Mei 2026
Desishonnan relashoná spesífikamente ku asuntunan di pais riba nivel nashonal di djárason, 27 di mei 2026:
1. Programa “Leergang Onderwijskundig Leiderschap” (Ministerio di Enseñansa, Siensia, Kultura i Deporte)
Konseho di Minister a aprobá e plan di akshon pa e Programa “Leergang Onderwijskundig Leiderschap”. Lo realisá e proyekto den e periodo di mei 2026 te ku febrüari 2027, den kuadro di e Pakete Pais Kòrsou i den koperashon ku Tijdelijke Werkorganisatie (TWO) i e Komishon Nashonal di Reforma (NHC). Ta manda e plan di akshon pa e Sekretario di Estado pa Relashonnan den Reino i Gobièrnu Efektivo pa e siguiente fase di e trayekto.
2. Protokòl di e Tratado di Ekstradishon Oropeo (Ministerio di Asuntunan General)
Konseho di Minister a aprobá un instrukshon na Minister Plenipotensiario pa Konseho di Minister di Reino di 29 di mei 2026 tokante e di kuater protokòl adishonal komo parti di e Tratado Oropeo di Ekstradishon. Esaki ta inkluí, entre otro, aprobashon pa firma e protokòl.
3. Tratado di servisio aéreo entre Kòrsou i Canada (Ministerio di Asuntunan General)
Konseho di Minister a aprobá un instrukshon na Minister Plenipotensiario pa Konseho di Minister di Reino di 29 di mei tokante e tratado di servisio aéreo entre Kòrsou i Canada. Esaki ta trata aprobashon pa sera e tratado i pa pone esaki den prosedura pa mas aprobashon.
4. Tratadonan di “Wereldpostunie” (Ministerio di Asuntunan General)
Konseho di Minister a aprobá un instrukshon na Minister Plenipotensiario pa Konseho di Minister di Reino di 29 di mei 2026 tokante vários protokòl i tratadonan suplementario di “Wereldpostunie”.
5. Tratado di duana entre Reino Hulandes i India (Ministerio di Asuntunan General)
Konseho di Minister a aprobá un instrukshon na Minister Plenipotensiario pa Konseho di Minister di Reino di 29 di mei 2026 tokante e tratado entre Reino Hulandes i India den kuadro di yudansa atministrativo mutuo den asuntunan di duana.
