Publiká riba 01 Desèmber 2023
Desishonnan relashoná spesífikamente ku asuntunan di pais riba nivel nashonal di djárason, 29 di novèmber 2023:
1. Petishon pa un plan di akshon modernisashon di kondishonnan di empleo (Minister di Maneho di Gobernashon, Planifikashon i Servisio Públiko)
Konseho di Minister ta bai di akuerdo ku e plan di akshon pa modernisashon di kondishonnan di empleo (medida UA Q4 2022 B6.6). Minister di Maneho di Gobernashon, Planifikashon i Servisio Públiko lo sòru pa kontinuashon di e kombenionan ku lo sali for di e medida akí den agènda di ehekushon di e Pakete Pais.
2. Konseho tokante e modifikashon di presupuesto pa e proyekto ‘Gezinsvervangend Tehuis Zapateer’ (Minister di Salubridat, Medio Ambiente i Naturalesa)
Konseho di Minister ta bai di akuerdo ku modifikashonnan pidí den presupuesto. Ministerio di Salubridat, Medio Ambiente i Naturalesa ke adaptá e presupuesto segun e reglanan di artíkulo 47, insiso tres, di ‘Landsverordening comptabiliteit 2010. Esaki ta pa e proyekto di konstruí un ‘Gezinsvervangend Tehuis’ pa personanan ku un desabilidat rasional leve na Zapateer.
E desishon akí ta basá riba e konseho di dia 6 di novèmber 2023 di Direktor di sektor di Maneho Finansiero i Maneho di Presupuesto i e proposishon di dia 6 di novèmber 2023 na Minister di Salubridat, Medio Ambiente i Naturalesa.
3. Aporte di ministerio pa desaroyo ekonómiko pa ‘Routekaart Klimaatstrategie Curaçao (Minister di Desaroyo Ekonómiko)
Konseho di Minister ta bai di akuerdo ku e siguiente desishonnan:
1. Ta bai di akuerdo ku loke tin pará den e dokumento yamá: ‘Routekaart Klimaatadaptatiestrategie Curaçao’, inkluso e akshonnan i rekomendashonnan. Akiden tin tambe e ‘input’ di Ministerio di Desaroyo Ekonómiko (EO), manera ta deskribí den e karta di dia 20 di novèmber 2023 di e Minister di Desaroyo Ekonómiko.
2. Curaçao Climate Change Platform mester saka un relato anual i entregá esaki na Minister di Tráfiko, Transporte i Planifikashon Urbano.
3. Ta duna e responsabilidat pa ehekushon di e ‘Klimaatadaptatiestrategie’ (menshoná den e punto di desishon 1) na Curaçao Climate Change Platform, bou di guia di Sr. A. Martis, direktor di Servisio Meteorológiko.
Esaki ta basá riba e petishon di dia 7 di ougùstùs 2023 di Minister di Tráfiko, Transporte i Planifikashon Urbano i teniendo kuenta ku e karta di 20 di novèmber 2023 di Minister di Desaroyo Ekonómiko.
4. Entrega rapòrt di investigashon di TNO tokante parkenan di mulina flotante i ekonomia hidrógeno na Kòrsou (Minister di Desaroyo Ekonómiko)
Konseho di Minister ta bai di akuerdo ku e siguiente desishonnan:
1. A tuma nota di rapòrt di análisis di TNO, entregá pa Minister di Desaroyo Ekonómiko riba 9 di novèmber 2023, titulá ‘Feasibility study floating offshore wind farms and hydrogen economy in Curaçao’.
2. Ta kontinuá ku preparashonnan pa e proyekto di parkenan di mulina flotante ‘offshore’ i produkshon di hidrógeno na gran eskala.
3. Lo formalisá e kolaborashon ku gobièrnu hulandes mas pronto ku ta posibel p’asina sigurá e finansiamentu pa e gastunan di preparashon pa e proyekto.
E ehekushon di esaki lo ta den man di e grupo di trabou, manera a pidi den e petishon di 20 di novèmber 2023 di Minister di Desaroyo Ekonómiko.
5. Petishon pa lantamentu di ‘Stichting avond-en weekendhuisartsenpost (HAP) (Minister di Salubridat, Medio ambiente i Naturalesa)
Konseho di Minister ta bai di akuerdo ku e siguiente desishonnan:
1. E lantamentu di ‘Stichting Huisartsenpost’ ku e meta pa kumpli ku loke tin deskribí den artíkulo 1, sekshonnan 1 te ku 11, di e konsepto di lei agregá.
2. Lo pidi pèrmit pa modifikashon den presupuesto pa e Ministerio di Salubridat, Medio Ambiente i Naturalesa segun reglanan di artíkulo 47, insiso tres, di ‘Landsverordening Comptabiliteit 2010’. Esaki ta pa kubri gastu di e wardanan di anochi, mardugá i fin di siman (Huisartsenpost) via di SVB pa aña 2023.
3. Ta bai di akuerdo ku kontenido i intenshon di e konsepto di lei agregá. Ku esaki Minister di Salubridat, Medio Ambiente i Naturalesa i/òf un persona asigná p’e, ta keda apoderá pa ehekutá e akshonnan (legal) pa lantamentu di e fundashon. E akshonnan akí mester sosodé si ku e konsehonan rekerí di e konsehero di ‘corporate governance’, esta SBTNO.
4. Ta entregá e konsepto di lei na Gobernador pa firma.
Esaki ta basá riba konseho di dia 27 di novèmber 2023 di Direktor di Sektor di Maneho Finansiero i Maneho di Presupuesto, e petishon di dia 27 di novèmber 2023 di Minister di Salubridat, Medio ambiente i Naturalesa, i aserka teniendo kuenta ku e konseho di 30 di òktober 2023 di e Direktor di Sektor di Maneho Finansiero i Maneho di Presupuesto.
6. Petishon pa kontratá ehekutivonan i hunta di komisario pa ‘Stichting Huisartsenpost (HAP) (Minister di Salubridat, Medio Ambiente i Naturalesa)
Ta pidi konseho na e ‘adviseur coporate governance’ (SBTNO) tokante di ‘concept-statuten’ pa e ‘Stichting Huisartsepost Curaçao, e ‘concept-profielschetsen’ pa hunta di komisario i e ‘concept-werving’ i proseso di selekshon pa e ehekutivo di ‘Stichting Huisartsenpost Curaçao’.
7. Konseho tokante di repartishon di gastunan pa konstrukshon di 60 kas sosial pa FKP (Minister di Desaroyo Sosial, Labor i Bienestar)
Konseho di Minister a bai di akuerdo ku kambionan proponé den e presupuesto. Minister di Desaroyo Sosial, Labor i Bienestar ke mira un repartishon pa kubri e gastunan pa konstrukshon di 60 kas sosial dor di Fundashon Kas Popular (FKP). Ta hasi esaki segun reglanan di artíkulo 47, insiso 3, di e ‘Landsverordening compatbiliteit 2010’ E desishon akí ta basá riba e konseho di 30 di òktober 2023 di Direktor di Sektor pa Maneho Finansiero i Maneho di Presupuesto.
