Desishonnan di djárason 3 di aprel 2024

Desishonnan relashoná spesífikamente ku asuntunan di pais riba nivel nashonal di djárason, 3 di aprel 2024:

1. Konseho tokante e perfil di riesgo di Kòrsou 2023-2028 (Minister di Asuntunan General)

Konseho di Minister ta akordá e siguiente desishonnan:

1. Aprobashon di e dokumentu titulá “Perfil di Riesgo di Kòrsou 2023-2028”, prepará na ougùstùs 2023 pa Direktorado di Kontrol di Riesgo i Maneho pa Kalamidat.
2. Aprobashon di e proyekto di lei den konsepto pa stipulá e dokumentu menshoná na punto 1.
3. E servisionan i organisashonnan den e ministerionan ta risibí instruksho tokante tumamentu di medidanan ku ta redusí e riesgonan krítiko ku ta bini dilanti den e perfil di riesgo.
4. E Koordinadó di Krísis Nashonal ta haña aprobashon pa, na nòmber di e ministerionan responsabel, fasilitá i kordiná na momentu di traha riba e riesgonan krítiko, riba petishon i den konformidat ku e ministerio respektivo.
5. Obligashon di e Koordinadó di Krísis Nashonal pa raportá periódikamente na e Minister di Asuntunan General tokante e imáhen di riesgo di Kòrsou denter di e kuadronan di e Lei di Maneho di Desaster i Krísis (LvoRC).
6. Petishon na e servisionan i organisashonnan pa koperá ku e Koordinadó di Krísis Nashonal den duna informashon tokante maneho di e riesgonan krítiko, konforme artíkulo 14 di e LvoRC.
7. Enkargá e direktornan finansiero di e ministerionan pa garantisá ku e servisionan tin sufisiente fondo pa trata e riesgonan identifiká, den konsulta ku Ministerio di Finansa.
8. Rekomendashon na esnan responsabel pa e presupuestonan pa reservá sufisiente fondo riba pòst di presupuesto 4466 pa kontrol di krísis i maneho di kalamidat, konforme anekso 1 di e ‘Regeling handleiding rekenschema’.

E desishonnan akí ta basá riba konseho di e Direktor di Direktorado di Kontrol di Riesgo i Maneho pa Kalamidat, tambe Kordinadó Nashonal di Krísis, di 22 di febrüari 2024 i petishon di Minister di Asuntunan General di 29 di febrüari 2024. E proyekto di lei den konsepto lo ser presentá na Gobernador pa firma.

2. Nota di Konsepto pa un proposishon di lei a base di e konsepto di lei pa kombatí labamentu di plaka, finansiamentu di terorismo i finansiamentu di proliferashon (Minister di Finansa)

Konseho di Minister ta di akuerdo ku kontenido i presentashon di e proposishon di lei, kual a resultá for di rapòrt di e konsepto di lei pa kombatí labamentu di plaka, finansiamentu di terorismo i finansiamentu di proliferashon. E proposishon akí lo ser presentá na Parlamento dor di Direktorado di Lei i Asuntunan Hurídiko pa keda tratá. Esaki ta konforme proposishon di e Minister di Finansa interino di dia 28 di mart 2024.

3. Proposishon pa kambio den konsepto di lei pa kombatí labamentu di plaka, finansiamentu di terorismo i finansiamentu di proliferashon (Minister di Finansa)

Konseho di Minister ta di akuerdo ku kontenido i presentashon di e proposishon pa trese kambio den e konsepto di lei pa kombatí labamentu di plaka, finansiamentu di terorismo i finansiamentu di proliferashon. E proposishon akí lo ser presentá na Parlamento dor di Direktorado di Lei i Asuntunan Hurídiko pa keda tratá. Esaki ta konforme proposishon di e Minister di Finansa interino di dia 28 di mart 2024.

MAS NOTISIA