Desishonnan di djárason 31 di yanüari 2024

Desishonnan relashoná spesífikamente ku asuntunan di pais riba nivel nashonal di djárason, 31 di yanüari 2024:

1. Petishon pa (re)nombramentu di akountentnan eksterno pa entidatnan públiko segun e ‘Code Corporate Governance’ (Minister di Asuntunan General)

Konseho di Minister ta bai di akuerdo i ta manda e karta preparatorio tokante e (re) nombramentu di akountentnan eksterno, manera ta preskribí pa e Code Corporate Governance, na e direktivanan i huntanan di Komisario di entidatnan públiko.

2. Petishon pa ratifiká e protokòl di modifikashon pa e Tratado Oropeo kontra Terorismo, 2003 Minister di Hustisia)

Konseho di Minister ta bai di akuerdo ku e siguiente puntonan:

1. E konfirmashon ku Kòrsou ta uni su mes na e modifikashonnan di e Tratado Oropeo pa kombatí terorismo, manera a akordá na Straatsburg riba 15 di mei 2003;
2. Aseptashon di un kondishon previo hasí pa Reino tokante di un parti spesífiko di e protokòl aki pa Kòrsou;
3. Pa kuminsá ku e proseso ofisial di outorisashon pa e Protokòl aki dor di Direktorado di Relashonnan Eksterno.

3. Petishon pa aprobashon di e Tratado i Protokòl Adishonal kontra korupshon. (Minister di Hustisia)

Konseho di minister ta bai akuerdo ku ratifikashon i aplikashon na Kòrsou di e Tratado Oropeo i Protokòl Adishonal kontra korupshon, meskos ku inklushon di kondishonnan similar ku esun di Hulanda. Banda di esei ta apuntá IRC Carib pa petishonnan pa yudansa legislativo i NCB-Interpol di Ministerio di Hustisia komo outoridat prinsipal. Direktorado di Relashonnan Eksterno lo start ku e proseso pa ratifikashon di e dokumentonan aki, nan tur den liña ku e petishon di Minister di Hustisia di 4 di yanüari 2024.

4. Di dos Nota di ahuste na e presupuesto 2024(Minister di Finansa)

Konseho di Minister a bai di akuerdo ku e Di Dos Nota di ahuste pa Presupuesto di 2024. E kambio, presentá pa Minister di Finansa riba 19 di yanüari 2024, lo wòrdu presentá na Staten di Kòrsou.

5. Petishon pa interkambio di informashon entre instansianan di gobièrnu (Minister di Finansa)

Konseho di Minister a bai di akuerdo ku tratonan importante tokante interkambio di informashon entre servisionan di gobièrnu i servisio di impuesto, pa asina por kobra belasting i preminan di un forma mas mihó. Abou por mira un resúmen di e tratonan:

1. Servisionan di Gobièrnu a petishon mester duna informashonnan importante ku ta nesesario pa determiná impuestonan i premi na Servisio di Impuesto. Esakinan mester kuadra si ku reglanan tokante uso di e informashonnan aki.
2. Servisionan di gobièrnu lo yuda pa establesé un manera konkreto di interkambio di informashon digital ku Servisio di Impuesto.
3. Si tin gastunan pa fasilitá e informashonnan aki manera kreashon di un sistema pa interkambio di informashon, Servisio di impuesto lo kubri esakinan ku fondonan for di Presupuesto di Reforma (Hervormingsbudget)
4. Servisionan di gobièrnu no por kobra èkstra pa kompartí e informashonnan aki.
5. Na momentu di kompartí informashon ku servisio di impuesto mester paga tinu di forma estrikto riba protekshon di informashonnan personal, spesialmente riba e seguridat di esaki.
6. Si tin reglanan ku ta rekerí konfidensialidat pa motibu di un trabou òf funshon, mester tene kuenta ku esakinan.

E akuerdonan aki ta trahá a base di un petishon di Minister di Finansa di 29 di yanüari 2024 i konseho di e Direktor di Legislashon i Asuntunan Hurídiko di 25 di yanüari 2024.

MAS NOTISIA