Desishonnan di djárason 6 di mart 2024

Desishonnan relashoná spesífikamente ku asuntunan di pais riba nivel nashonal di djárason, 6 di mart 2024:

1. Propuesta pa un Memorandum of Understanding (MoU) den konsepto tokante salubridat públiko entre India i Kòrsou (Minister di Salubridat, Medio Ambiente i Naturalesa)

Konseho di Minister ta bai di akuerdo ku e siguiente puntunan:

1. Aprobashon di e Memorandum of Understanding (MoU) den konsepto entre Minister di Salubridat di India i Minister di Salubridat, Medio Ambiente i Naturalesa di Kòrsou. E akuerdo akí tin komo meta pa fortifiká e kolaborashon di salubridat entre ámbos pais a base di igualdat i benefisio mutuo, respetando leinan nashonal, regla i pólisa di tur dos pais.
2. Aprobashon di un desishon preliminar ku ta outorisá Minister di Salubridat, Medio Ambiente i Naturalesa pa firma e Memorandum na nòmber di Kòrsou. Esaki bou di e kondishon ku e gastunan aktual ta permanesé denter di e montantenan presupuestá manera deskribí den e desishon. Si e gastunan sobrepasá, esaki lo mester keda kubrí dor di e presupuesto di Ministerio di Salubridat, Medio Ambiente i Naturalesa sin gastu adishonal.

E desishonnan akí ta basá riba proposishon di Minister di Salubridat, Medio Ambiente i Naturalesa di dia 22 di febrüari 2024, huntu ku konseho di Direktor di sektor di Maneho Finansiero i Maneho di Presupuesto i Direktor di Direktorado di Lei i Asuntunan Hurídiko. Seguidamente lo presentá e desishon preliminario akí na Gobernador pa keda firma.

2. Proposishon pa un karta tokante e proyekto di bùsnan eléktriko den kuadro di e MoU (Memorando di Entendimiento) pa transishon energétiko (Minister di Tráfiko, Transporte i Planifikashon Urbano)

Konseho di Minister ta bai di akuerdo ku kontenido i proposishon di un karta, fechá 4 di mart 2024, di Promé Minister i Minister interino di Tráfiko, Transporte i Planifikashon Urbano. E karta ta dirigí na Minister di Asuntunan Ekonómiko i Klima, Minister pa Klima i Energia, i Sekretario di Estado di Relashonnan den Reino i Digitalisashon. Ta trata aki di implementashon di e proyekto di bùsnan eléktriko komo parti di e MoU (Memorando di Entendimiento) relashoná ku transishon energétiko.

3. Proposishon pa ratifikashon di e tratado di Nashonnan Uní kontra korupshon (Minister di Hustisia)

Konseho di Minister ta aseptá e desishonnan pa ku pasonan importante pa kombatí korupshon pa medio di e Tratado di Nashonnan Uní kontra korupshon, adoptá na New York riba 31 di òktober 2003. E desishonnan ta inkluí:

1. Aplikashon ofisial di e tratado di Nashonnan Uní kontra korupshon pa Kòrsou.
2. Nombramentu di Parkèt di Prokurador General na Ministerio Públiko komo outoridat prinsipal pa ehekushon di e tratado.
3. Aseptashon di algun kondishonnan spesífiko den e tratado ku anteriormente a keda establesé pa Reino.
4. Inisio di e proseso ofisial pa ratifiká e tratado bou di guia di Direktorado di Relashonnan Eksterior.

E desishon akí ta basá riba proposishon di Minister di Hustisia dia 20 di desèmber 2023.

MAS NOTISIA