Desishonnan di djárason 8 di mart 2023

Desishonnan relashoná spesífikamente ku asuntunan di pais riba nivel nashonal di djárason, 8 di mart 2023:

1. Relashoná ku konseho di Direktor di Direktorado di Relashonnan Eksterior tokante e miembresia asosiá ku CARICOM, Konseho di Minister ta aprobá e siguiente puntonan:

1. 1. Di akuerdo pa pais Kòrsou tin un miembresia asosiá ku Caribbean Community (CARICOM);
   2. Pa Direktorado di Relashonnan Eksterior atendé i finalisá tur negosiashonnan di tratado ku tin di haber ku e miembresia asosiá manera menshoná den e punto anterior;
   3. Pa CARICOM indiká kuantu e kontribushon pa 2024 ta bai sali di forma ku ya por kuminsá pone esaki riba presupuesto di 2024. Na otro momentu Konseho di Minister lo determiná riba presupuesto di kua ministerio òf organisashon e gastu akí mester bin kai.

Esaki konforme konseho di Direktor di Direktorado di Relashonnan Eksterior di dia 28 di febrüari 2023.

Ministerio(nan) responsabel: Ministerio di Asuntunan General.

---

2. Konseho di Minister ta bai di akuerdo pa dokumentá e desishon ku ya a keda tumá riba 23 di febrüari 2023, relashoná ku e instrukshon (den konsepto) na Minister Plenipotensiario den kuadro di e reunion di Konseho di Minister di Reino ku ta tuma lugá riba 24 di febrüari 2023. E ta enserá aprobashon di e siguiente desishon ku a proponé, esta “Instemmen met het sluiten van het verdrag en het aanhangig doen maken van het verdrag met het oog op stilzwijgende goedkeuring om advies bij de Afdeling advisering van de Raad van State van het Koninkrijk”.

Esaki konforme petishonnan di Minister di Asuntunan General di tantu 22 komo 27 di febrüari 2023 i tambe konseho di Direktor di Relashonnan Eksterior di dia 21 di febrüari 2023.

Ministerio(nan) responsabel: Ministerio di Asuntunan General.

---

3. Konseho di Minister a tuma nota di e karta den konsepto titulá “Request to send an advisory mission from the Council of Europe to Curacao on cyber issues”, ku a keda presentá dor di Minister di Tráfiko, Transporte i Planifikashon Urbano na Sekretario General interino di Konseho di Oropa.

Ministerio(nan) responsabel: Ministerio di Tráfiko, Transporte i Planifikashon Urbano.

---

4. Konseho di Minister ta bai di akuerdo pa presentá konsepto di e dekreto nashonal ku ta enserá medidanan relashoná ku ehekushon di artíkulo 6, insiso unu, di e Lei Konseho Supremo Elektoral (Landsbesluit profiel leden Electorale Raad) na Gobernador pa keda firmá.

Esaki konforme konseho di Direktor di Direktorado di Lei i Kasonan Hurídiko i tumando na konsiderashon petishon di Minister di Maneho di Gobernashon, Planifikashon i Servisio Públiko di dia 8 di mart 2023.

Ministerio(nan) responsabel: Ministerio di Asuntunan General i Ministerio di Maneho di Gobernashon, Planifikashon i Servisio Públiko.

---

5. Konseho di Minister ta bai di akuerdo ku e ‘begrotingsaanschrijving’ pa 2024 kaminda ta indiká e puntonan di salida i tambe metanan di maneho, inkluso planifikashon di esaki. Esaki konforme konseho di Direktor di Sektor di Maneho Finansiero i Maneho di Presupuesto di dia 3 di mart 2021 i tambe petishon di Minister di Finansa di dia 3 di mart 2023.

Ministerio(nan) responsabel: Ministerio di Finansa.

---

6. Referiendo na e desishon di dia 8 di mart 2023, Konseho di Minister ta bai di akuerdo pa enkargá Minister di Finansa, sr. J. F. A. Silvania, tambe ku maneho di Ministerio di Salubridat Públiko, Medio Ambiente i Naturalesa, kon tal ku ta adaptá e dekreto nashonal di dia 16 di yüni 2021, no. 21/991 segun e dekreto nashonal den konsepto ku tin awor akí.

Alabes Konseho di Minister ta bai di akuerdo pa entregá e dekreto nashonal den konsepto na Gobernador pa firma.

Ministerio(nan) responsabel: Ministerio di Asuntunan General.