Estimado lesado,
Tras di e link aki bo por haña e konsepto di e Lei General di Derecho Atministrativo (Algemene landsverordening bestuursrecht (Alb).
Ku esaki, Kòrsou ta tuma un promé paso pa yega na un ordenansa di Reglanan General di Derecho Atministrativo, ku por kontribuí un manera signifikante na uniformashon di leinan i bon gobernashon. E ordenansa tambe ta duna un kuadro normativo aktual pa aktividatnan atministrativo pa supervishon, ehekushon i mandato.
Ku e lei aki ta kumpli ku e mandato pa elabora regla general pa derecho atministrativo, stipulá den Konstitushon di Kòrsou. E konsepto aki ta presentá pa e Komishon Algemene regels bestuursrecht, instalá den yüli 2020,i a tuma forma ku asistensia di algun ekspertonan.
Komo ku e ordenansa aki ta di gran nifikashon pa siudadanonan i instansianan di gobièrnu, a disidí pa habri un konsulta públiko pa e konsepto di lei via internèt. Asina ta duna oportunidat na tur siudadano pa revisá e konsepto i pa entregá nan komentario, sugerensia òf punto di atenshon.
Nos ta balorá bo aporte. Bo komentario, sugerensia òf punto di atenshon riba e konsepto di lei i memoria di splikashon por wòrdu mandá via e-mail: consultatiealb@gov.cw. Bo reakshon por wòrdu mandá te pa mas tarda 1 di sèptèmber 2026.
Por fabor inkluí bo nòmber i si ta apliká, e organisashon ku bo ta representá. Reakshonnan anónimo no ta wòrdu tuma den konsiderashon. Despues di 1 sèptèmber 2026 tur reakshon lo wòrdu inventarisá. Seguidamente, e Komishon lo presentá e konsepto definitivo na Gobièrnu.
Pa evitá malkomprondementu: bo no ta risibí un reakshon individual tokante bo aporte na e konsepto. Si bo tin algun pregunta pa e Komishon, bo por hasi esaki via e email ariba menshoná.
Masha danki pa bo interés i aporte!
Komishon Algemene regels bestuursrecht,
instalá pa medio di e dekreto nashonal (Landsbesluit) di 24 yüli 2020 no. 20/91
