1 desèmber 2019: Dia di Enseñansa - Informashon tokante Gobièrnu di Kòrsou Bo opinion

Notisia

1 desèmber 2019: Dia di Enseñansa

Geplaatst op 30 November 2019 dor di Ministerio Enseñansa, Siensia, Kultura & Deporte

Gobièrnu ta deseá henter pueblo di Kòrsou un felis dia di Enseñansa.

E tema sentral e aña aki ta: “Enseñansa sigur pa un i tur, i pa uni tur”.

WILLEMSTAD – Promé di desèmber Gobièrnu di Kòrsou ta deseá henter komunidat un felis dia di Enseñansa. E dia aki a keda dekretá ofisialmente komo dia di enseñansa na 1981. Gezaghebber sr. R.A.Casseres a dekretá e dia aki komo e dia ofisial ku nos ta pone atenshon na nos enseñansa. E desishon aki a keda tumá konsiderando ku den e deklarashon di derechonan humano ta indiká ku mester garantisá ku tur suidadano mester haña enseñansa aksesibel pa un desaroyo di e ser humano segun Nashonnan Uni.

E fecha aki ta keda selebrá tur aña kaminda ta pone atenshon na temanan ku ta di balor pa e enseñansa. Aña pasá a pone atenshon na e desaroyo físiko i deportivo kaminda huntu ku alumnonan di dos skol (Marnix Kas Kòrá i Skol M.M.Römer) a hasi un selebrashon deportivo. E aña eskolar aki nos ta keda ku e enfoke riba Seguridat na i rondó di skol. Pesei Sektor di Enseñansa huntu ku tur e ‘stakeholdernan’ ta kanando ketu bai riba e trayekto ku ta salbaguardiá Seguridat. Pa es motibu e tema sentral di e selebrashon e aña aki ta: “Enseñansa sigur pa un i tur, i pa uni tur”.

Gobièrnu insular a kuminsá ku e dia di reflekshon/selebrashon for di 1979 i 1980 na Sentro Deportivo Kòrsou na Brievengat di forma no ofishal. Despues na aña 1981 e dekreto ofishal keda firmá i na 1982 e proklamashon a keda firmá pa e Gezaghebber sr. R.A.Casseres. Pues por bisa ku ofishalmante ta selebrá e fecha aki pa di 38 aña i 40 aña ku e dos añanan no-ofishal aden. Ministerio di Enseñansa, Siensia, Kultura & Deporte por mira bèk riba vários aña di selebrashon i reflekshon den koperashon ku tur e partnernan den enseñansa. Un danki di kurason ta bai na tur diputado di enseñansa di teritorio insular i tur ministernan di enseñansa ku huntu ku e Ministerio di Enseñansa a karga i traha na nos enseñansa di forma hopi profeshonal i positivo.

Konforme e akuerdo di koperashon i kolaborashon ku a keda firmá na ougùstùs 2019 entre e Ministerio Enseñansa, Siensia, Kutura & Deporte i Ministerio di Hustisia a kuminsá ku un plataforma kaminda vários organisashon ta trahando huntu pa ku seguridat na i rondó di Skolnan. E  proyekto kaminda Kuerpo Polisial i Skolnan ta traha huntu den 5 diferente barionan ku ta Otrabanda, Bandabou/Barber, Punda, Montaña i Rio Canario. E agentenan polisial (Buurtregisseurs) ta sostené e kabes di Skolnan (Schoolleiders) pa ku e área di seguridat na skol. Huntu ku mas organisashon ta tene seshonan informativo i duna asistensia direkto. Tur esakinan huntu ta pone ku asina ta halsa e seguridat na skol i tambe den bario kaminda e desaroyo sosial mester tuma lugá den un ambiente sosial sano. E inisiativa riba e tereno aki ta pa yuda krea un ambiente sigur i plasentero, kaminda profeshonalnan ta duna sosten na e suidadano pa e por desaroyá trankil i di un manera sano. Alabes por bisa ku e trayekto aki ta kanando bon i ya kaba por mira ku e koperashon ta dunando bon resultado pa ku komunikashon entre Kuerpo Polisial i Skolnan, i komo fruta di esaki, oumento di seguridat sosial i físiko.

Gobièrnu di Kòrsou ta hopi satisfecho ku ta trahando riba e trayekto aki, pa asina trese trankilidat i halsa seguridat den skolnan tantu pa e alumno, studiante, e dosente pero tambe e mayor. Alabes ta konta ku sosten di komunidat kompletu, pasobra seguridat den área di skol i den nos barionan, ta nos tur su responsabilidat. Pesei e tema aki ta keda e tema prinsipal pa e konmemorashon/selebrashon e aña aki: “Enseñansa sigur pa un i tur, i pa uni tur”.

Na nòmber di Gobièrnu di Kòrsou, Ministerio di Enseñansa, Siensia, Kultura & Deporte den persona di Minister Marilyn Alcalá-Wallé  ta deseá henter pueblo di Kòrsou un felis dia di Enseñansa pero en espeshal e ta deseá tur e profeshonal nan ku ta traha pa i den Enseñansa un felis dia i alabes ta deseá tur nos muchanan i hóbenan un dia bendishoná pa asina nan logra nan meta nan pa e aña eskolar aki.


KOMUNIKASHON

Ministerio konserní