Notisia

Diskurso di minister enkargá ku Enseñansa sr. Sithree van Heydoorn

WILLEMSTAD – Promé di desèmber ta Dia di Enseñansa. A instituí e dia akí di forma ofishal na aña 1981, pues e aña akí ta marka su di 40 aniversario. Den e kuadro akí, Minister Sithree van Heydoorn enkargá ku enseñansa ta invitá komunidat pa sigui su diskurso na bo planta di televishon preferí riba djárason, 1 di desèmber 2021 pa 7’or di anochi. 

Durante di e diskurso akí lo papia di e puntonan di mas importante pa enseñansa, manera: Investigashon inisial (nulmeting) den enseñansa, digitalisashon di enseñansa, investigashon di e situashon di enseñansa (doorlichting), maneho pa remodelashon di edifisionan di skolnan, trayekto pa enseñansa speshal, kolaborashon ku Hulanda pa un mihó desaroyo pa enseñansa, formashon deportivo i kultural na skolnan i mas tema importante pa nos enseñansa.

Ministerio di Enseñansa, Siensia, Kultura i Deporte (ESKD) ta informá alabes ku no ta tene un selebrashon manera ta e kustumber e aña akí. Na momentu ku selebrá ku tur personal di enseñansa, esta mas ku 2.000 persona, e situashon di riesgo pa kontagio di COVID-19 ta bira hopi grandi i esaki no ta rekomendabel konforme e medidanan di prekoushon di Gobièrnu. Ta bai tin vários aktividat riba e dia si manera: Tratamentu di presupuesto pa aña 2022, reunionnan den Reino tokante enseñansa (onderwijs vierlandenoverleg) i mas reunionnan ku enseñansa komo tópiko. Ta tene kuenta tambe ku e echo ku situashon finansiero di pais ta sumamente delikado. 

Henter pueblo en general i speshalmente e komunidat di enseñansa ta keda invitá pa sigui e diskurso di Minister Sithree van Heydoorn na e planta di televishon preferí òf via di e plataformanan digital di Gobièrnu di Kòrsou riba 1 di desèmber pa 7’or di anochi.

**************************

MAS NOTISIA

Ministerio konserní: Enseñansa, Siensia, Kultura & Deporte