Willemstad/ Kralendijk: Resientemente 13 personal di Justitiële Inrichting Caribisch Nederland Bonaire (JICN) a hasi un bishita di trabou na Sentro di Detenshon i Korekshon Kòrsou (SDKK).
E meta di e bishita aki, tabata pa e personal di prizòn di JICN Bonaire, por a sera konosi ku e prizòn di Kòrsou i tambe pa por a interkambiá konosementu i eksperensia ku otro.
E bishita aki tabata enserá un presentashon general di SDKK, sigui pa un rekoridó den e instituto i na final e 13 personal di JICN a keda reparti na diferente departamentunan den SDKK.
Gerensia di SDKK ta sumamente kontentu ku e bishita aki i ta spera ku den futuro ku lo tin mas di e interkambionan aki.
Riba kombinashon di potrèt por mira e 13 personal di JICN huntu ku direktor suplente di SDKK sr.Anthony Hasselmeijer i tambe ku varios di e hefenan di prizòn SDKK.
