Publiká riba 18 Desèmber 2017
Willemstad – For di ougùstùs 2017 un total di 13 personal di Ministerio di Desaroyo Sosial, Labor i Bienestar (SOAW), huntu ku Ministerio di Enseñansa, Sensia, Kultura & Deporte (OWCS), Ministerio di Salubridat Públiko, Medio Ambiente i Naturalesa (GMN) i Ministerio di Tráfiko, Transporte i Planifikashon Urbano (VVRP), a sigui e kurso di “Buitengewone Agent van Politie (BAP)/Bijzondere Opsporingsambtenaar (BOA)”, organisá pa Inspekshon di SOAW.
Algun di e materianan ku e kursistanan a haña den e trayekto aki ta: Inleiding tot recht; Integriteit (L.M.A); Strafvordering; Strafrecht i Proces-verbaal van aanhouding.
Dia 18 dezèmber 2017 Minister di SOAW a entregá e kursistanan nan sertifikado den presensia di dosentenan di First Caribbean “Total” Security – and Law Enforcement Services B.V., ku a duna e kurso ariba menshoná.
Awor ta sigui nan huramentashon komo Buitengewone Agent van Politie /Bijzondere Opsporingsambtenaar serka Minister di Hustisia den komienso di otro aña.
Minister Sr. Hensley Koeiman a deseá tur e kursistanan tur klase di éksito, perseveransia i kurashi den e trabounan ku nan lo desplegá.
