15 ámtenar a kuminsá ku estudio di Hurista di Legislashon - Informashon tokante Gobièrnu di Kòrsou Bo opinion

Notisia

15 ámtenar a kuminsá ku estudio di Hurista di Legislashon

Geplaatst op 24 September 2020 dor di Ministerio Asuntunan General i Promé Minister

WILLEMSTAD – Ròl di un hurista di legislashon den e aparato gubernamental ta di vital importansia. Gobièrnu di Kòrsou, pa medio di ministerio di Asuntunan General (AZ) i Ministerio di Maneho di Gobernashon, Planifikashon i Servisio Públiko (BPD) a hasi posibel pa 15 ámtenar partisipá na un estudio pa bira hurista di legislashon sertifiká. Meimei di e retonan ku nos pais ta konfrontá, Gobièrnu di Kòrsou ta konsiderá imperativo pa nos pais ta disponé di personanan kapas, ophetivo i íntegro pa yuda reforsá e kapasidat legislativo di nos aparato gubernamental.

 E estudio pa hurista di legislashon sertifiká a keda organisá den koperashon estrecho entre Gobièrnu di Kòrsou, Gobièrnu di Aruba, i e respektivo universidatnan di ámbos isla riba inisiativa di Departamentu di Asuntunan Hurídiko (WJZ). Di parti di Kòrsou, un total di 65 persona a mustra interes pa partisipá na e estudio aki. E organisashon sentral di Gobièrnu pa desaroyo di e ámtenar (IMPULSO) huntu ku dekano di University of Curaçao (UoC) i tambe WJZ, a hasi un selekshon di 15 ámtenar representando e diferente ministerionan di e aparato gubernamental pa forma parti na e estudio aki. E estudio di hurista di legislashon ta un estudio partaim (deeltijdopleiding) ku durashon di un aña i lo keda duná di forma kompletamente digital.

Durante e estudio lo profundisá ku e partisipante riba diferente aspekto di importansia manera entre otro derecho di estado, derecho atministrativo, téknikanan di legislashon i hopi mas. Stabilisashon i Restrukturashon di Pais Kòrsou ta basá riba diferente trayektonan hurídiko.

Pa por enkaminá e trayektonan aki manera debe ser, nos aparato gubernamental mester por konta ku huristanan ku tin e fundeshi i e konosementu sólido riba tereno legislativo. Tantu den desaroyo di leinan nobo komo mehorashon di esnan eksistente, pero tambe den implementashon i proyekshon di kada maneho, nos fundeshi mester ta ankrá den nos leinan vigente i leinan internashonal ku ta aplikabel pa nos pais.

 Djaluna 14 di sèptèmber último partisipantenan di tantu Kòrsou komo Aruba a ranka sali riba e reto nobo aki. Na momentu ku e partisipante terminá e estudio aki ku éksito, e lo por laborá komo hurista di legislashon tantu na Kòrsou, Aruba i/òf St. Maarten riba kualke tereno di maneho. Esaki ta nifiká ku aki un aña ku e esfuerso i dedikashon di nos partisipantenan, Gobièrnu di Kòrsou por konta ku un ekipo aún mas fuerte i kapas na interes di Pais Kòrsou.

Ministerio konserní