Publiká riba 14 Mei 2020
Willemstad – Dia internashonal di Famia, ku ta konmemorá tur aña riba 15 di mei, ta para ketu na importansha di famia rònt mundo. Kada kultura tin su sistema di famia. Famianan tradishonal i no-tradishonal tur ta forma fundamento di komunidat. Mayoria hende ta risibí mayoria formashon den famia. Durante e periodo aki di e pandemia di COVID-19, gobièrmu a hasi un apelashon èkstra riba konbibensha i responsabilidat soshal di famianan. Hopi famia a sufri impakto di e medidanan ku a keda tumá pa protekshon di henter komunidat. A pidi koperashon di famianan pa protehá nan mes i otronan dor di keda kas, tene distansha i kumpli ku e medidanan di higiena.
Esaki ta tin un impakto riba komunidat. Hopi famia a bai atras den entrada, algun a pèrdè trabou, ku tur e konsekuenshanan ku esaki ta trese. Tambe mayornan mester a adaptá na situashonnan kaminda tur hende mester a keda den kas i trankil pa strès i violensia no oumentá. Algun mayor mester a sigui kumpli ku nan trabounan diario siendo ku mester a organisá pa tur kos na kas sigui funshoná. Hendenan grandi hopi biaha a keda isolá i e manera kustumbrá pa tuma despedida den kaso di morto tambe ta tin impakto riba famianan. Muchanan no ta tin skol ni aktividatnan despues di skol i di rekreo ku a pone ku mayornan direpente a kuminsa fungi komo maestronan di skol i mester a sòru pa entretené e muchanan.
Famianan a bira vulnerabel i gobièrmu a i ta sigui hasi tur esfuerso pa sigui sostené nan ku entrada, kuminda i ayudo sosial-emoshonal. Komo miembro di famia nos kier pidi komunidat pa tuma tempu i pensa krítiko kiko famia ta nifiká pa kada un di nos. Kon nos por sigui mustra solidaridat pa otro. Riba e dia aki nos kier yama danki na boso tur komo un famia grandi ku a demostrá sivismo. solidaridat i koperashon. Danki pa tur esfuerso di boso parti pa yuda nos protehá Kòrsou kontra e malesa di COVID-19.
