17 kliente di SDKK ta risibí sertifikado di kurso di furadó di muebel i kosedó industrial - Informashon tokante Gobièrnu di Kòrsou Bo opinion

Notisia

17 kliente di SDKK ta risibí sertifikado di kurso di furadó di muebel i kosedó industrial

Geplaatst op 06 August 2021 dor di Ministerio Hustisia

WILLEMSTAD – Riba djaweps 5 di ougùstùs 2021 tabatin entrega di sertifikado na dos grupo di kliente di prizòn ku a terminá e kursonan di Furadó di muebel i Kosedó industrial ku éksito. E programa tabatin un durashon di 12 siman den kua e kursistanan a siña dominá e téknikanan básiko di kosementu industrial i furamentu di muebel. 

Den bon koperashon entre SDKK i CanCan Training & Adviesbureau, i ku aporte finansiero di IPE (Institute for Professional Excellence), por a yega na e bunita proyekto akí. 

Na okashon di entrega di sertifikado na e 17 kursistanan, a hiba palabra lider di proyekto señor Ephren Candelaria, dosentenan Hermanus i Weigle, señor Geomaly Martes den representashon di IPE, direktor di SDKK señor Urny Floran i tambe nos Promé Minister di Kòrsou i alabes Minister di Hustisia señor Gilmar Pisas ku a enfatisá riba su bida komo hóben ku a perseverá di kaminda el a lanta te kaminda e ta awor komo lider di pais. Tambe el a konsehá tur e kursistanan pa hasi bon uso di e fishi ku nan a siña pa asina na por produsí kosnan riba merkado lokal i internashonal. 

E seremonia a terminá den ambiente ameno kaminda tur presente por a pasa i mira e artíkulonan ku e kursistanan a produsí. Gerensia di prizòn ta kontentu ku e desaroyo positivo akí i lo bai sigui traha riba kursonan den kuadro di resosialisashon di klientenan di SDKK. Pa mas informashon por bishitá e Facebook página: SDKK- Sentro di detenshon i korekshon Kòrsou.

 

Ministerio konserní