2 yüli 2019 Kòrsou a para ketu na 35 aña Dia di Bandera - Informashon tokante Gobièrnu di Kòrsou Bo opinion

Notisia

2 yüli 2019 Kòrsou a para ketu na 35 aña Dia di Bandera

Geplaatst op 03 July 2019 dor di Ministerio Enseñansa, Siensia, Kultura & Deporte

WILLEMSTAD – E mainta a keda habrí pa e maestro di seremonia sr. Gilliard ‘Tito’ Doran ku a sa di guia henter e parti ofishal. E kuerponan uniformá a desfilá  i drenta Plasa Brion pa asina por a kuminsá ku e sermonia ofishal. E flambeu a keda sendé pa nos atleta Vanessa Mercera den representashon di Glenka Antonia ku no por tabata presente.

Despues a sigui ku entrada di gruponan hubenil di pas huntu ku peloton di bandera bou di guia di Komandante Dinaira Martina. Mgr. Luis Secco a hiba palabra na nòmber di Konseho di Iglesia kaminda el a sa di stimulá henter e pueblo pa ban biba den pas i harmonia ku otro. Siguidamente a hisa e bandera kaminda nos hóbennan dignamente a sa di hisa nos bandera di un manera solèm ku pèrmit di nos Promé Minister sr. Eugene Rhuggenaath. Despues nos Himno a keda toká pa Dennis Aalse Youth Orchestra, Dennis Aalse Big Band i interpretá pa e hóbennan Sebastian Salgado i Alysha Wythe.

A sigui ku diskurso di nos Minister di Enseñansa, Siensia, Kultura & Deporte sra. Marilyn Alcalá-Wallé i nos promé Minister sr. Eugene Rhuggenaath. Tantu Minister di Kultura, komo Minister Presidènt a para ketu na e tópiko di Identidat di nos Nashon.

Parti di e programa di e mainta emoshonante tabata entrega di Krus di Mérito kaminda sra. Ange Marie Philomène Jessurun, sr. Oswin Cristino (Chin) Behilia, sra. Swinda Marcela Albertus Conradus i sra. Iva Violette Hooghuis Martina a keda kondekorá pa Gobièrnu di Kòrsou. Sr. Wendell Prince, kende tambe ta un nominado pa e kondekorashon, pa motibu di salú no por tabata presente.  Tambe tabatin entrega di un bunita diseño di  stampia diseñá pa Avansia Damberg. Representante di Manager Marketing & Sales di C-Post, sr. Trevor Nisbet, a hasi entrega di e stampia na su ekselensia Gobernador sra. Lucille George-Wout, Presidente di Parlamentu sr. William Millerson, nos promé Minister sr. Eugene Rhuggenaath  i  Minister di Enseñansa, Siensia, Kultura i Deporte sra. Marilyn Alcalá-Wallé.

Den e aña aki ku ta aña di Kaha di òrgel, awe riba Dia di Bandera Gobièrnu di Kòrsou a duna rekonosementu na tokadónan di kaha di òrgel i tokadonan di wiri. Sr. Sterling “Chelo” Elodia a risibí un rekonosementu na nòmber di tur tokadó di wiri.  Komo muestra di inklushon i apresio pa su abilidat diferente, Juan Javier Halabi tambe a risibí un rekonosementu pa su talento di por toka kaha di òrgel.

Alabes e mainta a keda deleita ku vários artisita di un Festival un Kanto pa Kòrsou manera Eldridson Eugenia, Harlianne Silvania, Veanira Reed, Deborah Gomez, Heidiluske Angelista, Dinette Aitatus i Arnulies Aitatus, Joël Villarreal i Richard Engelhardt. Siguidamente un tremendo show kultural a keda presentá ku a rindi tributo na Universo, Naturalesa, Elementonan Awa, Airu, Kandela i Tera & Kreashon di Kòrsou. Grupo nan ku a presentá esaki tabata: Influensia musikal Europeo, Influensia musikal Afrikano. Artistanan ku ta forma parti di e show: Steltenlopers, Grupo di Baile Explotion Dancers, Grupo di Baile D’Art PM, Grupo di Baile SKOBA, Grupo di Baile Memoria di Kòrsou i Akisha Albert.

Gobièrnu di Kòrsou a hasi entrega di trofeo na tur gruponan hudisial i gruponan uniformá den forma di un rekonosementu na Okashon di 35 aña kontinuo di nan partisipashon na dia di Bandera. Un representante di kada un di e organisashonnan aki a risibí e trofeo na momentu ku su grupo tabata desfilá riba Plasa Brion.

Ganadó di “Un Kanto pa Kòrsou”, Richard Engelhardt, a kanta su kansion titulá “Siendo Un Feto ya mi a stima’bo”, akompañá pa Grupo di baile Memoria di Kòrsou. Tambe durante di e programa Ganadó di Kantadó Mayó, Sharrel Adjatay Denisia a presentá su kansion titulá: “Na pia mes nos tei hal’é” , akompañá pa Brassband PCD, Drojeanz Dance Organization i presentashon D’Art. E mainta a keda klausura ku Presentashon di Rei di Tumba sr. Dibo Doran ku su tumba ganadó: “Kòrsou bo ta den su Gloria” akompañá pa presentashon Drojeanz Dance Organization, Grupo di Baile Explotion Dancers, Grupo di Baile Sembra Alegria i Grupo di Baile di Memoria di Kòrsou.

Gobièrnu di Kòrsou ta mira bèk riba un momento di reflekshon i alegria dunando honor na e símbulo di nos identidat ku ta nos Bandera na okashon di e di 35 aniversario.

Pa mas potrèt por klik riba e link aki: Facebook Ministerie van OWCS

 —

KOMUNIKASHON

Ministerio konserní