Notisia

Willemstad – Awe,23 di mart 2019, Mundu kompletu ta selebrá Dia Mundial di Meteorologia. E Organisashon Mundial di Meterologia (WMO) ta konmemorá e konvenio di 23 di mart 1950 kaminda a establesé WMO.  Riba e dia ta duna atenshon speshal na e importansia di servisio meteorológiko pa salbaguardia bida humano i propiedat. 

 

Tema di e aña aki ta ‘Solo, Mundu i Wer’. Solo ta duna e energia ku ta hasi tur bida riba mundu posibel. E ta dirihí wer, korientenan di laman, i siklonan hidrológiko. E ta forma nos estado emoshonal i aktividatnan diario. Solo ta tambe inspirashon pa músika, fotografia, i arte. 

 

Na Kòrsou, Servisio Meterológiko ta traha diariamente pa duna informashon verídiko, konfiabel i alkaso na diferente gremio manera sektor di aviashon, sektor marítimo, i públiko en general. 

 

E aña aki Kòrsou tabata anfitrion di e di 41 seshon di e ‘RA IV Hurricane Committee’ di e Organisashon Meteorológiko Mundial (OMM). Esaki a tuma lugá na Sta. Barbara Beach & Golf Resort for di dia 18 te ku 22 di mart 2019.

 

Tambe a organisa un seshon informativo interesante titulá ‘Hurricane Preparedness and the Business Enterprise’. 

 

Banda di esaki, Meteo a modernisá e stashon outomátiko na Savonet pa e por midi preshon i temperatura na diferente momentu, i midi e kantidat di awaseru ku a kai kontinuamente. E data aki ta kontribuí na nos konosementu di prosesonan meteorológiko i klimatológiko global i lokal, i e ta parti di un ret pa pronostiká inundashon riba Kòrsou.

 

Minister Jesus-Leito huntu ku Tim di Maneho di Ministerio di Tráfiko, Transporte i Planifikashon Urbano ta felisitá tur ku ta laborá na Meteo Kòrsou riba e dia speshal aki!