Publiká riba 16 Òktober 2024
WILLEMSTAD – Resientemente un total di 26 partisipante a finalisá e kurso di ‘Rijdend met Kompas sertifikado B’ pa sea shofùr di taksi òf bùs ku éksito . E kurso a keda organisá pa Ministerio di Tráfiko, Transporte i Planifikashon Urbano (VVRP) den estrecho kolaborashon ku Ofisina di Turismo di Kòrsou (CTB). Durante un seremonia ameno, Minister di Tráfiko, Transporte i Planifikashon Urbano i alabes Minister di Desaroyo Ekonómiko, sr. Charles Cooper akompañá pa sr. Sithree van Heydoorn, Minister di Enseñansa, Sensia, Kultura i Deporte (OWCS) a hasi entrega di sertifikado na e partisipantenan.
E kurso di transporte públiko ‘Rijdend met Kompas sertifikado B’ a kuminsá na mei 2024 i a terminá sèptèmber 2024. Meta di e kurso tabata pa duna oportunidat pa bira un shòfùr profeshonal di transporte públiko, sea pa kore taksi òf bùs. E kurso ta konsistí di diferente tema ku ta di importansia pa e shòfùr profeshonal, entre otro; lei di transporte, 3 diferente idioma tantu verbal komo por eskrito, servisio di kalidat, turismo resiliente, bo salú, i hopi mas. E kurso a tuma lugá na Universidat di Kòrsou (UoC) i a keda kordiná pa Nostra Growth ku ta e instansia sertifiká pa Ministerio di Enseñansa pa duna e kurso di transporte públiko.
Tambe a premia e kursistanan ku a destaká tantu durante lèsnan i tambe por medio di nan puntuashon. Esakinan tabata sr. Armando Martinez, sr. Kennedy Kierindongo i tambe Valdi Mercera.
Por tuma nota ku tin diferente partisipante yòn ku a interesá pa bira shofùr profeshonal. Esaki sigur ta algu di aploudí mirando ku e ta duna indikashon ku nan tambe ta mira potensial den un trabou den área di transporte públiko i tambe turismo.
VVRP, CTB, OWCS, Nostra Growth i UoC ta felisitá tur partisipante ku a terminá e kurso ku éksito. Alabes ta deseá nan tur kos bon den nan karera komo shofùrnan profeshonal di transporte públiko ku lo ofresé servisio di kalidat.
