Publiká riba 16 Desèmber 2022
Willemstad – Minister Charles Cooper huntu ku Domeinbeheer ta informá ku durante 2022, Domeinbeheer a resolvé 585 petishon di suidadanonan pa loke ta asuntunan di tereno pa bibienda. Esaki ta inkluí kasonan manera entre otro prolongashon di ‘erfpacht’, traspaso di tereno, splitmentu di tereno, kambio di hür pa ‘erfpacht’, i legalisashon òf formalisashon di okupashon illegal.
Domeinbeheer a atendé mas ku 650 petishon total den 2022. 90% di esaki, esta 585, ta petishon tokante tereno pa bibienda. E demas 10% ta proyektonan komersial chikitu, manera entre otro trahamentu di apartamentu. Riba e total di 650 petishon tambe tin ku konta proyektonan komersial i turístiko grandi.
Minister Cooper ta konsiente ku tin hopi petishon di pueblo pa asuntunan di tereno. Huntu ku Domeinbeheer, i komo parti di e ‘landspakket’, ta trahando riba un mihó maneho di tereno i bienesnan di Gobièrnu den su totalidat. Tambe ta trahando pa optimalisá e servisio ku Domeinbeheer ta brinda nos komunidat.
Di e forma aki, poko poko pero sigur Minister Cooper huntu ku Domeinbeheer ta atendé tur petishon ku tin na Domeinbeheer tokante asuntunan di tereno. Minister Cooper ta gradisí komunidat pa e pasenshi den esaki, i ta garantisá di lo sigui traha duru pa tur petishon keda resolvé mas rapido posibel.
