Bo opinion

Nieuws

Sifra índise di preis pa konsumidó pa luna di novèmber 2019

Geplaatst op 07 January 2020 dor di Ministerio Maneho di Gobernashon, Planifikashon i Servisio Públiko

Desaroyo di preisnan pa konsumidó na Kòrsou pa luna di novèmber 2019

For di sifra ku Ofisina Sentral di Statistik (CBS) a publiká awe ta indiká ku e nivel di preis promedio a subi ku 0.1 porshento na luna di novèmber 2019 kompará ku luna di òktober 2019. E sifra di inflashon a keda meskos na 2.7 porshento.

Desaroyo di preis luna novèmber 2019 kompará ku luna e luna anterior òktober 2019
E sifra índise di preis pa konsumidó (CPI, “Consumer Price Index”) di Kòrsou na luna di novèmber a subi ku 0.1 porshento kompará ku luna di òktober. E la desaroyá di 133.6 na òktober 2019 pa 133.7 na luna di novèmber 2019. E kambionan di preis mas importante di luna di novèmber 2019 ta; bahada di preis di gasolin (-2.5%), elektrisidat (-1.5%) i subida di preis di bebida (6.7%), sigaria (5.2%), “batata, berdura i fruta” (2.1%).

Desaroyo di preis luna di novèmber 2019 kompará ku luna di novèmber 2018
E CPI di novèmber 2019 (133.7) ta 2.8 porshento mas haltu ku e CPI di novèmber 2018 (130.0). E sifranan aki ta indiká ku e nivel di preis pa konsumidó durante luna di novèmber 2019 ta 2.8% mas haltu kompará ku e mes un luna na 2018. E kategorianan ku a kontribuí mas tantu na e subida aki ta bebida, sigaria, kuminda i bibienda.

Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba termino largu (usualmente 12 luna). E sifra di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, ònderstant/ benefisio sosial, sueldo mínimo i otro entrada.

Inflashon den un sierto luna ta ser kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku novèmber 2019 ku mes periodo un aña anterior, ta resultá ku preisnan na averahe a subi ku 2,7 porshento: e CPI promedio di 12 luna a desaroyá di 128.3 na novèmber 2018 pa 131.8 na novèmber 2019.

Pa mas detaye tokante di e topiko aki klik akinan CPI novèmber 2019

Ministerio konserní