Publiká riba 03 Òktober 2018
WILLEMSTAD – Ministerio di Enseñansa, Siensia, Kultura & Deporte den koperashon ku UNESCO Curaçao a tene un konferensia “Unda nos ta i unda nos ta bai” ku enfoke riba e vishon i maneho di Enseñansa i Siensia den un époka di kambio ku velosidat di lus.
Alumnonan di Skol di Fundeshi Johan Maurits a habri e mainta ku himno den presensia di Minister Presidente sr. E. Rhuggenaath, Minister di Enseñansa, Siensia, Kultura & Deporte sra. M. Alcalá-Wallé, Minister di Salubridat Públiko, Medio Ambiente & Naturalesa, sra. S. Camelia-Römer i Parlamentarionan; sr. Jeser El Ayoubi, sra. Gisette Seferina i sra. Ana Maria Pauletta. Tambe tabata tin diferente representante di e.o. direktivanan di skol, kabes di skol, fundashonnan ku ta traha riba e área di Enseñansa i Siensia, kolaboradornan di Ministerio di Enseñansa, Siensia, Kultura & Deporte i diferente aktornan relevante den e fèlt di Enseñansa i Siensia.
Durante di e seshon informativo aki, Minister sra. Marilyn Alcalá-Wallé ku alabes ta presidente di UNESCO Curaçao, a elaborá riba e vishon i maneho di Enseñansa i Siensia. E vishon pa edukashon riba término largu na Kòrsou ta unu kaminda Nos isla ta e modelo i e “hub” (konekshon) pa region. Den e kuadro aki mester sigurá edukashon di kalidat i ekitativo i inklusivo i mester promové oportunidat pa “lifelong learning” pa un i tur. Alabes Minister Alcalá-Wallé a duna indikashon ku e Plan di Desaroyo Nashonal Kòrsou, e Akuerdo i Programa di gobernashon i e Plan di urgensia di pais ta e base di maneho i ta sirbi komo guia pa e Ministerio i aktornan relevante. Tur esakinan huntu ta forma e proyekshon di e vishon komo pais na unda nos ta i na unda nos ke bai.
Direktor di Maneho di e Ministerio sra. Susan Larmonie-van Heydoorn a duna un presentashon di e kuadro i trayektonan ku e departamento di maneho di Ministerio di E.S.K.D ta trahando riba djé. Tambe a elaborá riba maneho i proyektonan ku ta keda aloká bou di e diferente metanan duradero sostenibel pa edukashon, stipulá pa Unesco den kuadro di e Agenda 2030.
E di tres orador, ku ta enkargá ku e area di ehekushon di maneho sr. Wladimir Kleinmoedig, komo direktor interino di Sektor di Enseñansa & Siensia a tene un presentashon relashoná ku tur e aktividatnan di ehekushon ku e departamento ta traha riba djé. Ela suprayá ku nos mester trese kambio den e manera ku nos ta guiá e trabounan pa por saka mihó rendimento for di e fls. 365 mion ku ta hinka den e sektor di Enseñansa, Siensia, Kultura i Deporte.
E enfoke di e presentashonnan a keda poné riba e punto #4 di Metanan Sostenibel Duradero di UNESCO (SDG 4), ku ta suprayá ku enseñansa mester: ‘Ensure inclusive and equitable quality education and promote lifelong learning opportunities for all”.
A konta ku un sala hopi yen kaminda tur partisipante a risibí e oportunidat pa hasi pregunta na e presentadónan i asina e interakshon positivo a tuma lugá den un ambiente partisipativo i ameno. Por mira bèk riba un mainta éksitoso i informativo.
***********************************************************************
