WILLEMSTAD – Durante oranan di awe mainta, personal di seguridat na SDKK a tuma nota
durante kontrol, ku un detenido ku tabata keda den e baraknan di hende hòmber, kual
tabata den su ultimo fase di sinta su kastigu pa rekobrá su libertat, a hui den oranan di
mardugá. Na momentu ku a konstatá e huida aki, mesora personal di SDKK a tuma kontakto
ku tim di maneho di SDKK, kual na su turno a informá Minister ku e detenido Gilberto M.
Jakoba lo mester a hui. Outoridatnan polisial ta enbuska di e sospechoso relashoná ku e
huida aki.
Komo Minister di Hustisia ta di lamentá ku e detenido, den su ultimo fase pa sinta su
kastigu i no opstante ku e tabata forma parti di e trayekto di resosialisashon ta skohe pa hasi
su mes kulpabel na un echo kastigabel i ta hui for di barak. Esaki ta demostrá un biaha mas
ku ta importante pa invershonnan ku ta tuma lugá na SDKK tantu pa material, ekipá e
personal i halsa e nivel di seguridat den e instituto unu mas haltu. Minister di Hustisia ke
hasi apelashon na Gilberto M. Jakoba, nase na Kòrsou, 5 di sèptèmber 1999 pa entrega bo
mes na outoridatnan di forma inmediato. Mas aleu ta importante pa rekordá un i tur, ku
esnan ku ta kolaborá òf yuda e sospechoso di un òf otro forma tambe ta kometé un echo
kastigabel pa lei i ku lo tin reperkushon tambe pa nan den e kaso aki.
