Publiká riba 02 Mart 2022
Willemstad – Ta temporada di sargassum den Karibe i Ministerio di Salubridat, Medio Ambiente i Naturalesa (GMN) a kuminsá ku preparashon pa por start ku e proseso di limpia playanan ku yena ku sargassum.
Semper durante sierto temporada di aña, Kòrsou i paisnan den Karibe ta risibí e asina yamá “sargassum”. Sargassum ta un “zeewier” ku ta krese na abundansia den laman rondó di e isla di Bermuda i otro islanan den besindario. Ora e sargassum lòs, e ta kuminsá drif riba laman i plama den laman Karibe. Ku otro palabra, semper tabatin i den futuro tambe lo tin sargassum den nos área.
Último añanan e kantidat di sargassum a bira mas i mas un molèster na diferente playa na parti nòrt wèst i tin biaha tambe zùit ost di Kòrsou. Boka Asencion i St. Jorisbaai ta dos playa ku mas tantu molèster kada aña di nobo. Konsekuentemente limpiesa di e dos playanan akí a bira parti di GMN su trabounan regular. Esaki ta tuma lugá dos bes pa aña.
Asina ku GMN haña e promé alerta serka Wardakosta òf for di Boneiru, ta kuminsá monitoriá e situashon di sargassum riba laman i tambe opservashon di playanan. Ora tin indikashon ku e sargassum riba laman a baha, GMN ta kuminsá ku e parti di limpiesa na e dos playanan. Ta di sumo importansia pa limpia e sargassum, teniendo kuenta ku e naturalesa ku ta biba den e awanan akí. Por ehèmpel tin diferente turtuga ku gusta bba den e áreanan akí i e presensia di sargassum por tin efekto negativo riba bida di e turtuganan. Tur aña, otro organisashonnan manera Sea Turtle Conservation Curaçao i Stichting Uniek Curaçao ta aportá na limpiesa di e dos playanan menshoná i tambe otro playanan.
Aktualmente tin hopi sargassum ku ta yegando tera na Kòrsou i tin mas na kaminda. Por lo pronto, GMN ta sigui monitoriá e situashon promé ku pasa na limpia e sitionan ku ta yena ku sargassum.
E potrètnan ta duna un bista di e situashon aktual di sargassum na Kòrsou.
