Publiká riba 27 Desèmber 2019
WILLEMSTAD – Durante e último dianan trahadónan di Ministerio di Desaroyo Sosial, Labor i Bienestar i Ministerio di Finansia a traha hopi duru pa realisá deseo di minister Koeiman i di Gobièrnu, pa – apesar e situashon finansiero difísil – duna un bónùs na personanan ku ta risibí ònderstant. Ta trata aki di tur kobradó di ònderstant ku manera a kustumbrá ta bin na remarke pa risibí e bónùs aki. Den e kuadro aki ta bon pa menshoná ku a surpasá e pòst di ònderstant ku mas ku 4 mion florin i ku mester a buska vários forma, pasando den un kantidat di pòst, pa por a logra yega na e suma aki.
Gobièrnu ta lamentá e inkonbinensia i tambe e echo ku pa motibu di malinformashon den medionan di prensa, tin hende a bai buska e bónùs sin ku esei a aparesé riba nan kuenta ainda. Minister Koeiman ta diskulpá ku awor numa e informashon ta sali, pero ta pidi komunidat su indulgensia ya ku Gobièrnu no por a komuniká e informashon aki promé ku tur kos a keda konkretisá. No opstante esaki Minister Koeiman ta kontentu ku e logro di finalmente por duna e bónùs na e kobradónan di ònderstant ku por hasi bon uzo di dje. Den e kaso aki Gobièrnu ta hasi su máksimo esfuerso pa pago di e bónùs tuma lugá djaluna 30 di desèmber próksimo i pa e sèn ta riba kuenta pa mas tardá e siguiente dia djamars.
Na nòmber di Ministerio di Desaroyo Sosial, Labor i Bienestar i tambe henter Gobièrnu di Kòrsou, Minister Koeiman ta deseá pueblo di Kòrsou en general i e kobradónan di ònderstant en partikular felis dianan di fiesta. Minister Koeiman ta komprometé su mes pa huntu ku e tim kompletu di Ministerio di Desaroyo Sosial, Labor i Bienestar, sigui traha pa empoderá e kobradónan di ònderstant, di forma ku mas pronto posibel nan por kuminsa partisipá den e proseso laboral i asina kria nan mes i nan sernan kerí.
Dios bendishoná Kòrsou i iluminá nos mente pa sigui tur loke ta real i positivo.
