Publiká riba 07 Òktober 2022
Willemstad – Resientemente e grupo di trabou ku ta konsistí di kolaboradónan di Ministerio di GMN i di Departamentu Hurídiko (WJZ) a tene un seshon di informashon relashoná ku lei ku ta regardá kalidat di airu. Esaki tabata spesial pa kompanianan, organisashonnan sosial i servisio di gobièrnu. Di GMN ta forma parti di e grupo di trabou Ciaretta Profas i Julio Abraham kual ámbos ta di departamentu di Maneho i Yair Stokkermans konsehero di kalidat di airu i di Departamentu Hurídiko Eva Hendricks ku tin eksperensha vasto ku tópikonan similar.
Intenshon di e seshon ta pa duna informashon relashoná ku e lei ku ta den formulashon i duna oportunidat na stakeholders pa duna sugerensha kual ta importante pa kalidat di e lei i su faktibilidat. Anteriormente dia 30 di sèptèmber a manda un konsepto pa tur e organisashonnan ku tabatei presente. Durante e presentashonan ku a tuma luga señora Hendricks a duna informashon amplio di e proseso pa yega na e lei. Señor Stokkermans a duna informashon detayá tokante kalidat di airu relatá na supstansha i efekto riba hende.
E konsulta ta importante paso e ta trese partisipashon, transparensha i plataforma di sosten den e proseso di kambio di lei pa yega na e lei nobo di kalidat di airu. Ku atenshon pa e parti di ehekushon kaminda a tene kuenta ku e parti di leges i kontròl. Dia 4 di òktober a tene un seshon di informashon kaminda stakeholders por a duna sugerensha riba e konsepto di lei. Den e último siman di òktober lo tene un seshon kaminda ta duna feedback riba sugerenshanan di stakeholders. Pronto lo sigui mas seshon di informashon.
###
