Publiká riba 30 Desèmber 2022
Willemstad – Resientemente Ministerio di Desaroyo Ekonómiko (MEO) a hasi un petishon na Konseho di Minister pa introdusí algun kambio den e manehonan pa bende kos kantu di kaminda for di un sitio fiho (standplaats), por ehèmpel usando un mesa, kiosko òf kantina móbil. Esaki ta konserní tantu e maneho pa espasionan den sentro di siudat komo esun pa espasionan pafó di sentro di siudat. Tambe, a pidi Konseho di Minister pa aprobá un maneho formulá spesífikamente pa pèrmitnan pa bende produkto òf duna servisio di forma ambulante (venten). Huntu ku esaki, MEO a pidi Konseho di Minister tambe pa aprobá reanudashon di e trayekto pa adaptá e lei di ‘leges’ huntu ku SOAB.
Manera ta konosí, Ministerio di Desaroyo Ekonómiko ta responsabel pa otorgá pèrmitnan ekonómiko. Esaki ta inkluí pèrmitnan pa un standplaats (p.e. trùk di batido, trùk di pan, garoshi di hòtdòg i stènt di souvenir) i pèrmitnan pa bende produkto òf duna servisio di forma ambulante kantu di kaya (vent). Pa e aktividatnan aki por sosodé di forma mas ordená posibel, MEO huntu ku entre otro Ministerio di Tráfiko, Transporte i Planifikashon Urbano (VVRP) a traha i publiká manehonan dirigí pa standplaats, unu pa esnan situá pafó di sentro di siudat i unu dirigí pa standplaats den sentro di siudat. Sinembargo, te ku resientemente no tabatin un maneho manera esaki ku ta trata pèrmitnan di vent. Den kuadro di esaki, MEO a konsultá ku Ministerio di VVRP, Ministerio di Salubridat, Medio Ambiente i Naturalesa (GMN), Direktorado di Lei i Kasonan Hurídiko (WJZ) i e departamento Unit Bijzondere Wetten (UBW) di ministerio di Hustisia pa asina yega na un konsepto inklusivo, teniendo kuenta ku puntonan di atenshon for di tur e diferente ministerio i organisashonnan gubernamental. Ku e maneho aki ta e deseo pa yega na struktura i uniformidat den e forma di trata ku petishon pa pèrmit i tambe kontrol di benta di produkto i servisio di forma ambulante kantu di kaya.
MEO a evaluá tambe implementashon di e maneho eksistente di standplaats i a base di desaroyonan aktual i tambe lokualnan a konstatá durante e implementashon, a pidi Konseho di Minister pa bai di akuerdo ku algun adaptashon den e maneho pa sentro di siudat i pafó di sentro di siudat. A hasi algun adaptashon general dor di agregá kriterionan di higiena di GMN i kriterionan di seguridat di Brantwer. Tambe a hasi adaptashonnan di karakter mas spesífiko. Por ehèmpel, a hasi algun kambio pa akomodá standplaats ku ta ubiká riba tereno privá òf otro lokalidatnan kaminda no tin efekto riba e fluho di tráfiko riba kayanan públiko, a agregá e posibilidat pa pone dekorashon na un standplaats i tambe a amplia e kantidat di sitionan pa artista den sentro di siudat.
Entretantu e manehonan adaptá di standplaats i e maneho di vent a keda publiká dor di Direktorado di Asuntunan Hurídiko (WJZ). Tur persona ku ya tin un pèrmit di standplaats òf vent òf ku kier hasi petishon pa un di e pèrmitnan aki, por informá nan mes di tur e kriterionan relashoná ku ehekushon di un pèrmit di standplaats òf vent.
Pa lesa e manehonan ku a keda publiká por klek aki òf bishitá wjz.gobiernu.cw.
