Adaptashon di e areglo pa personal den gabinete di minister - Informashon tokante Gobièrnu di Kòrsou

Notisia

Ministerio konserní Maneho di Gobernashon, Planifikashon i Servisio Públiko
 

Adaptashon di e areglo pa personal den gabinete di minister

Publiká riba 19 Yanüari 2022

WILLEMSTAD – Pa personal di gabinete di un minister ta konta for di 14 di yüni 2021 e mesun kondishon laboral ku ta konta pa empleadonan públiko. E kantidat máksimo di personal den un gabinete di un minister a subi di 5 pa 7 persona. Motibu pa e oumento ta pasó mester di èkstra kapasidat pa sostené e minister. Asina ta baha e nesesidat pa hür kònsùltant banda di e personal di un gabinete. Bon di esaki ta ku ta baha e gastunan ya ku di e forma akí ta evitá ku mester paga ekspertonan eksterno un retainersfee òf tarifa di kònsùltant.

Konseho di Minister a tuma riba 25 di ougùstùs 2021 e desishon pa adaptá e areglo pa personal di gabinete di un minister. Awor e personal den e gabinete ta risibí e mesun kompensashon di overtaim ku un empleado públiko a base di e kantidat di ora èkstra ku el a traha i no a base di un montante ku ta pag’é outomátikamente tur luna. Ademas e personal den un gabinete ku tabata traha kaba den gobièrnu lo no risibí outomátikamente 3 tret salarial mas ora e regresá su funshon, despues ku e minister retirá. E empleado ku a traha pa un minister mester tuma su dianan di fakansi i si akaso e no a hasi uso di nan, lo e pèrdè esakinan. Loke a keda mesun kos ku ántes ta ku e personal den un gabinete ta bini na remarke pa un kompensashon di 25% riba su salario, mirando ku e ta ehersé un tarea speshal.

Banda ku a subi e kantidat di personal den e gabinete di 5 pa 7 persona, a hasi adaptashon tambe den e tipo di funshon. A añadí e funshon di konsehero/speshalista. E persona nombrá pa e funshon akí mester por ehersé tambe e tareanan di hefe di gabinete. A añadí e funshon akí ya asina ministernan tin e oportunidat pa den un kuadro finansiero i hurídiko hasi uso di speshalista den e área di maneho di e ministerio. Asin’akí ta evitá tambe ku ta hür mas speshalista banda di e kantidat di personal ku ta permití òf inesesariamente pone mas hende na disposishon di e minister.

Pareu ku e intervenshon pa alsa efisiensia den e aparato públiko, un minister por tin nesesidat pa risibí sosten pa ehersé su tarea mihó. Dependé kon grandi un ministerio ta, e minister tin oportunidat pa hasi uso di 2 pa 3 persona den e funshon di sosten. Pa kada funshon a traha un perfil kaminda no solamente ta menshoná e tareanan, pero tambe e eksigensia pa kada funshon.