ADAPTASHON DI PRIMA DI SEGURO WA TA TRATA DI UN MÁKSIMO E PROSESO A INISIÁ FOR DI MEI 2016 - Informashon tokante Gobièrnu di Kòrsou Bo opinion

Notisia

ADAPTASHON DI PRIMA DI SEGURO WA TA TRATA DI UN MÁKSIMO E PROSESO A INISIÁ FOR DI MEI 2016

Geplaatst op 27 November 2017 dor di Ministerio Desaroyo Ekonómiko

WILLEMSTAD- Minister di Desaroyo Ekonómiko, Steven Martina a tuma nota ku e adaptashon di prima di seguronan WA (“wettelijke aansprakelijkheid” o ‘tersera parti’) a trese bastante konsternashon den nos komunidat. A base di esaki sr. Martina ke aklará ku e subida di 13,5% ta trata di un preis máksimo ku kompanianan di seguro por apliká den kaso di subida di e prima aki.

T’asina ku Gobièrnu di Kòrsou tin e deber pa revisá i adaptá e preis di, entre otro seguro WA. Esaki di akuerdo ku e ordenansanan di ‘Preis’ di 1961 i ‘WA’ di 1978. Adaptashon di preis ta sosodé en konekshon ku subida di gastunan di bida, preis di e produkto i kostonan di inflashon.

Den kaso di seguro WA, pa motibunan pafó di e esfera di influensia di Minister Martina e intentonan pa adaptá e prima despues di 1999 no a kristalisá. Konsiderando e subida di gastu den e último 18 añanan, kompanianan di seguro a duna di konosé di no por sigui brinda e produkto aki na un manera responsabel si no bini un adaptashon den e preis. Gobièrnu di Kòrsou a konstatá a base di investigashon i konseho di ekspertonan ku ta nesesario pa adaptá e prima di seguro WA. Sinembargo, si lo mester a hasi e adaptashon aki di akuerdo ku análisis di ekspertonan den e materia, esaki lo por a nifiká un oumento di te ku 37% di e prima. E trayekto di análisis a finalisá na dezèmber 2016 kaminda a manda un proposishon pa gobièrnu pa un oumentu máksimo di e prima ku 13,5%. Konseho di Minister a bai di akuerdo na febrüari último ku e proposishon pa e oumento di e prima. Despues di aprobashon di Konseho di Minister, e trayekto di finalisashon i adaptashon di e lei dor di e diferente instansianan a kontinuá. E trayekto aki a finalisá na sèptèmber di 2017. Pues na momentu ku sr. Martina a okupá e puesto di minister di Desaroyo Ekonómiko na yüni e aña aki, ya e trayekto a kana yega na punto pa reforsá e lei

Pa por protehá nos komunidat di un subida demasiado drástiko di e seguro di WA, gobièrnu a skohe konsientemente i ratifiká e desishon ku lo no subi e seguro ku 37%, segun kalkulashon di ekspertonan, pero te na un máksimo di 13,5%. Esaki ta nifiká pues ku e kompania di seguro por opta semper pa un porsentahe mas abou ku e máksimo di 13,5% stipulá pa gobièrnu pero en todo kaso lo no tin  mag di surpasá e subida di 13,5%.

Tur subida di preis ta doloroso pero ta di lamentá ku tin sierto informashon inkorekto sirkulando. Ta keda na kada kompania di seguro kiko e ta hasi ku e márgen ku el a haña i ta keda na e kliente pa skohe kua kompania di seguro e ke sigurá su mes serka dje, a base di preis, kalidat di servisio i pakete di produkto.

 

Ministerio konserní