Publiká riba 04 Sèptèmber 2026
Willemstad – Ministerio di Desaroyo Ekonómiko (MEO) i Qredits Kòrsou, den kolaborashon ku Federashon Kooperativanan Uní di Produkshon (FKUP), ta lansa un edishon nobo di Agri Business Academy. E programa di 11 siman ta kuminsá dia 22 di sèptèmber i lo tuma lugá dos biaha pa siman.
Durante e programa, empresarionan den sektor agrario lo risibí preparashon teorétiko i práktiko, entre otro den preparashon di un plan di negoshi i presentashon di nan konsepto empresarial. FKUP ta fasilitá e parti práktiko di e programa.
Pa e edishon aki tin un kantidat limitá di lugá disponibel i partisipashon ta kompletamente supsidiá pa MEO. Ku Agri Business Academy, MEO i Qredits ke fortalesé e konosementu i kapasidat empresarial nesesario pa desaroyá un negoshi sostenibel.
Despues di e programa, empresarionan por bini na remarke pa apliká via Qredits Kòrsou pa un fiansa te Cg 100.000 pa invershon den nan empresa.
Personanan interesá den Agri Business Academy por tuma kontakto ku Qredits Kòrsou via 465-8282 òf www.curacao.qredits.com pa mas informashon tokante inskripshon.
