Publiká riba 16 Mart 2018
Den e siman ku a pasa, Sentro di Akshon Kòrsou (Actiecentrum Ondermijning Curaçao – ACOC) a ehersé diferente intervenshon hudisial ku a duna resultado positivo. Entre otro a konfiská un kantidat di arma di kandela, arma blanku i droga. Di e forma aki diferente partner den kadena hudisial ta sigui traha huntu pa logra kombatí kriminalidat i trese e sentido di seguridat bèk den nos komunidat.
Arma di kandela i droga
Un di e akshonnan di ACOC ku a duna resultado, ta un redada hudisial ku a tuma lugá djárason 14 di mart den un kas na Soto. Durante di e akshon aki a bin topa ku un arma marka Baretta i tambe munishon. Riba djaweps 15 di mart Polis, Koninklijke Marechaussee, Curacaose Militie i Duana a tene un kòntròl den e áreanan di Rancho i riba Ronde Klipweg. E kòntròlnan aki tabata dirigí riba violashon di lei di arma di kandela. Durante di e kòntròl a konfiská arma blanku i droga i a hasi dos detenshon. Tambe Polis, den kuadro di e trabounan di ACOC a detené un hòmber sospechoso di violashon di lei di arma di kandela. A resultá despues ku e persona aki ta empleá na un kompania di seguridat pero ku na momento di kòntròl e no tabatin e pèrmit pa karga arma di kandela huntu kuné.
Minister di Hustisia, Sentro di Akshon Kòrsou i tur partner den kadena hudisial ta tuma kargamentu i uso di arma sin pèrmit pa hasi esaki, hopi na serio. Pues ta di sumo importansia pa personanan ku tin pèrmit pa karga arma di kandela, tin e pèrmit aki den nan poder tur momentu, manera lei ta preskribí, pasobra di ningun forma lo no tolerá kargamentu di arma ilegal.
Trafikashon di hende
Pa loke ta trata e aspekto gubernamental den Sentro di Akshon Kòrsou, a yega na e medida atministrativo pa retirá pèrmit di establesimentu i HORECA di e establesimentu Bandera Grill, a konsekuensia di e echo ku e propietario i su esposa a keda sentensiá pa trafikashon di hende.
Di e forma aki Sentro di Akshon Kòrsou ta sigui ku akshonnan riba nivel di informashon (informatie), investigashon (opsporing), mantenshon di órden i lei (rechtshandhaving) i maneho atministrativo (bestuurlijk beleid), pa asina atendé ku e problemátika rondó di 5 tema esta: arma di kandela, droga, likidashon, trafikashon di hende i formamentu di ‘gang’.
