Publiká riba 21 Sèptèmber 2022
WILLEMSTAD – Dia 23 di sèptèmber próksimo ta selebrá ‘SDG Flag Day’ (Dia di Bandera SDG). Riba e fecha akí ta rekordá e ‘fecha di nasementu’ di e Metanan di Desaroyo Sostenibel (SDG) den Nashonnan Uní. E SDG nan ta 17 meta ku ta pertenesé na Nashonnan Uní i a keda aseptá dor di 193 pais, ku e vishon pa hasi mundu un mihó lugá na aña 2030. E Metanan di Desaroyo Sostenibel akí ta un kompas pa trata retonan mas grandi manera pobresa, kambionan di klima i desigualdat.
Kòrsou tambe a aseptá e Metanan di Desaroyo Sostenibel akí. Akí na Kòrsou nos ta dirigí prinsipalmente riba e siguiente SDGnan; SDG 1 No Pobresa, SDG 3 Salubridat i Bienestar Optimal, SDG 4 Edukashon di Kalidat Haltu, SDG 7 Energia limpi i aksesibel, SDG 8 Trabou desente i kresementu ekonómiko i SDG 14 Bida bou di awa. Gobièrnu di Kòrsou ta selebrá e ‘SDG Flag Day’ dor di hisa e bandera di SDG den Fòrti. SER i ARC tambe lo hisa e bandera di SDG riba e fecha akí i asina mustra nan dedikashon na realisashon di e SDG nan.
Bo tambe ta deseá di hisa e bandera di SDG i mustra ku bo organisashon tambe ta pará tras di e SDG nan? Bo por hasi esaki dor di hisa e bandera di SDG di forma digital riba retnan sosial i usa #curacao2030, #simandikultura2022, #togetherfortheSDGs i #flipthescript. Ku e akshon akí, nos ke duna èkstra atenshon na e Metanan di Desaroyo Sostenibel i tambe pone atenshon na e esfuerso ku mester di parti di komunidat di Kòrsou kompletu pa por yega na realisashon di esakinan.
Huntu ku e ‘SDG Flag Day’ lo tin tambe selebrashon anual di Siman di Akshon di SDG (‘SDG Action Week’) for di 26 pa 30 di sèptèmber próksimo. Durante e siman akí ta bai tin diferente tayer i enkuentronan virtual tokante e Metanan di Desaroyo Sostenibel i Kòrsou su agènda lokal den esaki. E tópikonan e aña akí ta konektá na nos Siman di Kultura i e tema ta ‘Ban kunuku, ban planta!”.
E programa di ‘SDG Action Week’ ta optenibel riba curacao2030.cw bou di ‘Events’ i tambe riba e página di Facebook ‘SDG Curacao2030’. Registrá pa bo tambe por partisipá!
