Publiká riba 13 Ougùstùs 2019
Durante di e konferensia di apertura di aña eskolar 2019/2020 di Servisio di Skolnan Públiko, Minister di Enseñansa, Siensia, Kultura & Deporte, sra.Marilyn Alcalá-Wallé, Minister di Hustisia, sr. Quincy Qirigorie i Fiskal Mayó di Ministerio Públiko sr. Heiko de Jongh a firma un protokòl di koperashon huntu ku Promé Minister sr. Eugene Rhuggenaath. Alabes e ministernan tur a dirigí palabranan di rekonosementu i motivashon na tur e maestro i dosentenan presente relashoná ku komienso di e aña eskolar nobo 2019/2020.
E tema sentral di e konferensia aki tabata: ‘Un skol sigur, pa nos tur’. E konferensia a keda organisá pa Servisio di Skolnan Públiko den estrecho koperashon ku Kuerpo Polisial Kòrsou (KPC). Orador di òrden tabata na enkargo di halto Inspektor sra. Sharetti Bryan a hiba palabra i a sa di motivá tur presente ku un presentashon kaminda ela sa di kapta e realidat ku nos ta biba aden. Tambe ela kompartí ideanan kon pa traha riba e siguridat den nos skolnan. Sra. Bryan a terminá su diskurso bisando “Skol Sigur ta posibel basa nos mes ke!”
Kara Productions bou di guia di sr. Giovanni Abath a presentá kuater obra chiki ku komo tema sentral Kas/Klas/Kaya. E obranan ku a keda presentá den forma di dramatisashon a trese e realidat di Kas/Klas/Kaya di un forma basta humorístiko pero ku a laga tur hende para ketu na nos realidat.
Tambe durante di e dia a tene tayernan kaminda e maestro i dosentenan a sera konosí ku e trayekto den kua KPC lo bai duna sosten na e skolnan. Tambe sr. Lesley Fer a tene presentashon den kuadro di kalamidat kiko pa hasi i kon pa guia e proseso.
Ministerio di ESKD por mira bèk riba un dia fruktiferio i eksitoso kaminda tur presente na konferensia a keda motivá pa ban traha riba un ‘Skol sigur, pa nos tur’.
*********************
