Notisia

Gobièrnu di Kòrsou ta bai firma un AKUERDO DI KOPERASHON DEN KUADRO DI SEGURIDAT NA SKOL.

Seguridat den skol ta un prioridat pa Gobièrnu di Kòrsou i den e kuadro aki e ministerionan ta traha huntu. Djaluna dia 12 di ougùstùs 2019, Ministerio di Enseñansa, Siensia, Kultura & Deporte (ESKD) den koperashon ku Ministerio di Hustisia lo tene konferensia di apertura di aña eskolar 2019/2020, ku tin komo tema: ‘Un skol sigur pa nos tur”, i durante di e dia importante aki lo firma un protokòl di koperashon.

Minister di Hustisia mr. Quincy Girigorie i Minister di ESKD drs. Marilyn Alcalá-Walle huntu ku Fiskal Mayó mr. Heiko de Jong, ta bai firma un protokòl a base di un koperashon den kuadro di seguridat na i den área di skolnan. Durante di e parti ofishal ku ta di 08:00 pa 10:00 ta konta ku presensia i partisipashon di Ministernan i tambe lo firma e akuerdo di koperashon den sala prinisipal (Exhibition Hall) di WTC.

Promé ku a yega na e akuerdo di koperashon aki, diferente instansia manera e.o. Ministerio Públiko, Kuerpo Polisial di Kòrsou, Stichting Ambulante Justitiële Jeugdzorg Curaçao (AJJC) i e diferente Direktivanan di Skol, a deliberá algun luna i yega na palabrashonnan konkreto, kon ta bai koperá, kordiná i garantisá seguridat na i den área di skolnan aki na Kòrsou.

Ministerio di ESKD tei pa garantisá e kondishonnan di manera ku kada habitante di Kòrsou tin e posibilidat igual di desaroyo pa asina partisipá i aportá na ekonomia lokal. Esaki e ta hasi dor di mantené un relashon kontinuo i estrecho ku otro organisashonnan i direktivanan di skol, kaminda ta trata i ehekutá temanan komun na interes di e studiante en partikular.

Minister di Hustisia a proklamá aña 2019 komo aña di prevenshon i por mira e akuerdo aki komo un inisiativa mas pa riba tereno di edukashon yuda krea un ambiente sigur i plasentero, den kua e hóben por desaroyá trankil i di un manera sano.

Den kaso ku mester atendé ku krimennan kometé dor di òf ku menornan i hóbennan na skol òf den área di skol, Ministerio Públiko tambe su ròl ta sumamente importante i determinante. Lo atendé di un manera profeshonal ku e kasonan aki tambe, kaminda for di trempan lo intervení i asina evitá ku e menor òf e hóben aki lo kai den e sírkulo kriminal.

Gobièrnu di Kòrsou ta hopi satisfecho ku por a yega na e koperashon aki, pa asina trese trankilidat i halsa seguridat den skolnan tantu pa e studiante, e dosente pero tambe e mayor. Alabes ta konta ku sosten di komunidat kompletu, pasobra seguridat den área di skol, ta nos tur su responsabilidat.

*******************************

MAS NOTISIA

Ministerio konserní: Enseñansa, Siensia, Kultura & Deporte