Publiká riba 02 Novèmber 2022
Willemstad- Minister di Komersio i Industria di Repúblika di Trinidad & Tobago, sra Paula Gopee-Scoon ta di bishita na Kòrsou entre 1 pa 4 di novèmber den kuadro di un mishon komersial for di Port of Spain. Meta di e bishita komersial akí ta, entre otro pa reforsá lasonan ku ya a keda inisiá entre Kòrsou i Trinidad & Tobago. Durante di su bishita, minister Gopee- Scoon lo haña e oportunidat pa sera konosí mas di aserka ku empresa i servisionan di interes tantu den sektor públiko komo sektor privá i nos minister di Desaroyo Ekonómiko, sr. Ruisandro Cijntje, ta firma un akuerdo general ku Minister Gopee- Scoon pa formalisá e inisio di negosiashonnan komersial den área di produkto i servisio. E akuerdo general akí ta habri akseso preferensial den e merkado di Trinidad & Tobago pa produkto i servisionan di Kòrsou i mas ku klaro tambe visevèrsa. Produkto i servisionan ku tin enfoke riba dje durante e mishon komersial akí ta áreanan di alimento & bebida, alkohòl, produktonan di limpiesa, berdura, realidat virtual, produktonan pa kas i produktonan kímiko.
Benefisionan di un akuerdo komersial di e índole aki entre Kòrsou i Trinidad & Tobago ta ekstenso. Un di nan ta, ku Trinidad & Tobago ta e di tres pais di mas grandi di Caricom despues di Haiti i Jamaica i tin un poblashon di 1.4 mion i un ekonomia ku ta keda konsiderá un di esnan mas próspero den nos region. Trinidad ta saliendo for di un ekonomia ku tabata dependiente di petroli i ta diversifikando su eksportashon. 
Pa medio di un programa di e gobièrnu pa aktivamente stimulá eksportashon, e mandatario di Trinidad ta bini Kòrsou pa habri kaminda pa su empresarionan. Mirando e trayektoria ku Ministerio di Desaroyo Ekonómiko (MEO) ta kanando pa yega na implementashon di nos Strategia Nashonal di Eksportashon (NES), e akuerdo akí ta ligá na un di e ophetivonan stratégiko den e NES. Unabes ku nos tin un akuerdo di e taya akí ku Trinidad, nos ta spera di por sigui amplia i yega na un entendimentu ku Caricom pa akseso na merkado. Gobièrnu di Kòrsou ta den kombersashon ku Caricom pa bira miembro asosiá ku despues lo habri kaminda pa un akuerdo komersial ku Caricom, ku ta konsistí di 15 pais i un akuerdo komersial ku Trinidat & Tobago ta aportá grandemente na e kombersashonnan akí.
Durante e bishita di sra Gopee- Scoon e siman akí, Kámara di Komersio ta enkargá ku e agènda empresarial miéntras MEO huntu ku Cinex ta enkargá ku e bishita ofisial di e mandatario. Na luna di Febrüari di e aña akí, Minister Cijntje huntu ku KTK tabata di bishita na Trinidad & Tobago, kaminda KTK a firma un kontrato ku e kompania NEC pa trabounan di KTK na Trinidad & Tobago. Durante e bishita akí Minister Cijntje a ekstendé e invitashon na minister Gopee-Scoon pa bishitá Kòrsou den kuadro di un mishon komersial, i esaki a bira realidat e siman akí. Den e siman akí Minister Gopee-Scoon lo topa tambe ku nos Promé Minister, sr. Gilmar Pisas i tambe tin hopi interakshon planeá ku sektor priva di Kòrsou. Minister Gopee-Scoon lo bishita tambe nos Freezone, lo haña un tour di nos iglesianan Katóliko riba su propio petishon i tambe lo sòru pa dun’e un trato sublime pa asina e disfrutá plenamente di su bishita kòrtiku na Kòrsou.
