Notisia

WILLEMSTAD – Riba 1 di desèmber, Dia di Enseñansa, Ministerio di Enseñansa, Siensia, Kultura i Deporte (ESKD) a firma akuerdo ku Universidat di Kòrsou (UoC) i Inter-Continental University of the Caribbean (ICUC) ku e enfoke pa profeshonalisashon di dosente i maestro. Durante un enkuentro na Fòrti Minister di ESKD, sr. Sithree van Heydoorn, a firma un akuerdo ku kada un di e institutonan den presensia di tim di maneho di direktiva di UoC i representante di ICUC.

E akuerdo ku UoC ta pa sigui traha mas dirigí riba profeshonalisashon di nos profeshonalnan den enseñansa den e área di idioma; manera, papiamentu, hulandes, ingles i enseñansa di fundeshi. E akuerdo akí ta finansiá ku fondonan adishonal pa traha riba profeshonalisashon di studiantenan na UoC riba nivel di ‘bachelor’ i ‘master’. A la bes ta sigui traha huntu pa hasi mas investigashon sientífiko i preparashon pa e kurso di aplikashon pa enseñansa spesial, kurso di aplikashon pa diploma strañero (Applicatiecursus Buitenlandse Diploma’s) i mas aktividat spesífikamente dirigí riba profeshonalisashon.  

E akuerdo ku ICUC ta enserá traha i enfoká riba profeshonalismo den kuadro di matemátika. Huntu mester traha na implementashon di un programa ‘Master in Education and Applied Mathematics’. ICUC ta traha riba e estudio akí konforme un kuríkulo i programa ekibalente na estudio rekonosé na Hulanda. E estudio akí ta dura 2 aña i lo ta duná konforme e ordenansa di enseñansa sekundario i ta programá pa kuminsá na mart 2024. Kandidatonan ku kaba e estudio ku éksito lo ta kalifiká i outorisá pa duna matemátika na promé grado (1ste graads  bevoegdheid bevoegdheid) den  enseñansa sekundario di vsbo, sbo, havo, vwo i universidat.    

Ku firmamentu di e akuerdonan, ku e institutonan edukashonal avansá lokal, ta krea mas posibilidat di desaroyo di nos dosente i maestro di forma profeshonal huntu ku nos mes institutonan edukashonal ku ta traha di forma profeshonal pa enseñansa. Minister di ESKD sr. Sithree van Heydoorn sigur ta sigui traha na bienestar di nos pais ku nos mes hendenan pa asina brinda mas oportunidat pa empoderashon i mehorashon den kalidat di enseñansa.  

— 

KOMUNIKASHON 

**Riba e potrètnan athunto por tuma nota di e momento ku minister Sithree van Heydoorn a firma e akuerdonan. Pa mas potrèt por bishitá: Akuerdo ku UoC i ICUC