Publiká riba 30 Sèptèmber 2026
WILLEMSTAD – Riba djárason 30 di sèptèmber, Konseho di Minister durante su bishita ofisial na Kòrsou a reuní ku Alkalde di Savannah, Georgia, Van R. Johnson II. E reunion, a tuma lugá den un ambiente habrí i relahá, kaminda a papia tokante futuro di e kolaborashon entre Kòrsou i Savannah.
Promé Minister Pisas a enfatisá e importansia di e ‘International Friendship Agreement’ ku Kòrsou i Savannah lo firma. Segun Promé Minister, e kolaborashon akí ta duna Kòrsou akseso na konosementu, ekspertisio, retnan internashonal i kapasidat ku por kontribuí na desaroyo di nos pais. Den e kuadro akí, el a pidi atenshon spesial pa kolaborashon den área di deporte, inkluyendo posibilidatnan pa trese konosementu i ‘coach’ nan ku eksperensia pa Kòrsou, pa asina sigui fortalesé desaroyo di deporte lokal.
Promé Minister a ekspresá tambe su ekspektativa ku e relashon ku Savannah lo habri porta pa oportunidatnan nobo den negoshi i ekonomia. El a rekordá tambe riba e promé kontaktonan ku a kuminsá mas o ménos dos aña pasá, rondó di e bishita di Rei Willem-Alexander i Reina Máxima na Atlanta i Savannah. Minister Pisas a ekspresá su apresio pa e kontinuidat ku a duna na e kontaktonan for di e tempu ei i pa mira ku awor nan ta tradusí den kolaborashon konkreto.
Gobiernu di Kòrsou ta ekspresá tambe su rekonosementu na Konsulado General di Reino Hulandes na Atlanta pa e sosten i estímulo ku el a duna na e kontaktonan entre Kòrsou i Savannah durante e último dos añanan. Na un manera partikular, Gobiernu ta rekonosé e kontribushon di èks- Kònsùl General Jaap Veerman, kende a hunga un papel importante i instrumental den establesé i sigui desaroyá e kontaktonan akí.
Durante e kombersashon, Alkalde Johnson a enfatisá ku en realidat, e amistat entre Savannah i Kòrsou ya ta eksistí kaba. Segun Mayor Johnson, e laso personal akí ta forma un base fuerte pa por traha huntu tambe riba tereno di negoshi i entre institushonnan: ta agradabel pa hasi negoshi ku amigunan.
Durante e bishita di e delegashon di Savannah, ya a identifiká diferente oportunidat konkreto pa kolaborashon. Den área di siensia marino i investigashon, a establesé kontaktonan ku entre otro, CARMABI, Sea-Aquarium i Savannah State University. Ta eksplorá posibilidatnan pa investigashon konhunto, interkambio di studiante i sientífiko, uso di fasilidatnan di investigashon i kolaborashon pa haña finansiamentu internashonal pa investigashon.
Tambe den área kultural a identifiká diferente punto di konekshon. Esaki ta inkluí posibilidat pa kolaborashon ku NAAM den área di investigashon, digitalisashon i interkambio di studiante, komo tambe interkambio di konosementu tokante patrimonio kultural, preservashon di idioma i turismo basá riba patrimonio.
Ademas, durante di bishitanan na e sektor marítimo di Kòrsou, a papia tokante posibilidatnan pa amplia kolaborashon ekonómiko. Entre otro, Curaçao Ports Authority, CDM/Damen i 2Bays a presentá nan desaroyonan i ambishonnan. Tin interes mutuo pa sigui ku kontaktonan ku Savannah, entre otro den área di desaroyo di haf, servisio marítimo, ‘aquaculture’ i formashon tékniko.
“E Friendship Agreement” lo forma e kuadro pa sigui desaroyá e kontaktonan aki i konektá institushonnan, empresanan, organisashonnan di konosementu i instansianan gubernamental di ámbos banda direktamente ku otro.
Minister di Desaroyo Ekonómiko Roderick Middelhof lo firma e akuerdo na nòmber di Gobiernu di Kòrsou, huntu ku Alkalde Van R. Johnson II, na nòmber di City of Savannah.
Presente tabatei: Van R. Johnson II – Alkalde di Siudat di Savannah, Dionne Hoskins-Brown -Research Fishery Biologist, NOAA Fisheries | U.S. Department of Commerce & Savannah State University, Djuanna Brockington – Executive Director, Gullah Geechee Cultural Heritage Corridor NHA, Vanessa Toré – Sector Director, Foreign Economic Cooperation i Elior Boeldak- Ministerio di Desaroyo Ekonómiko.
