Publiká riba 15 Sèptèmber 2026
‘Preparando huntu pa posibel krísis’
Willemstad – ‘Preparashon pa kualke krísis’ ta e tema di e promé edishon di ‘Ami Ta Prepará Expo’, riba djasabra, 17 di òktober 2026 na Brionplein. Diferente organisashon gubernamental den maneho di krísis i otro organisashonnan lo ta presente pa duna informashon práktiko, tepnan balioso i konsehonan ku bishitantenan mes por apliká.
‘Ami Ta Prepará Expo’ ta parti di e trayekto di konsientisashon pa informá i prepará habitantenan di Kòrsou pa kualke situashon di krísis ku por presentá. Te ku aña pasá, ‘Ami Ta Prepará Expo’ tabata konosí komo ‘PrepareNOW Expo’, organisá pa e Direktorado di Kontròl di Riesgo i Maneho pa Kalamidat (DRR) huntu ku ‘stakeholder’i partnernan den maneho di krísis. E aña akí e expo ta konosé un nòmber i lokalidat nobo i ta ta ampliá tambe ku un ‘Ami Ta Prepará Scavenger Hunt’.
Huntu nos ta mihó prepará
Preparashon pa un krísis ta duna mas trankilidat. Ta p’esei diferente instansia gubernamental ta prepará durante henter aña pa por atendé kada situashon di krísis ku por presentá. Pa medio di diferente aktividat, ‘Ami Ta Prepará’ ta siña habitantenan di Kòrsou kon nan tambe por prepará nan mes mihó. Si mas hende ta prepará pa un krísis, esaki ta krea espasio pa organisashonnan di emergensia por duna asistensia na esnan mas vulnerabel den nos komunidat òf esnan ku no por yuda nan mes.
Prepará bo mes di un manera interaktivo
Djasabra 17 di òktober próksimo, lo pone atenshon na preparashon pa posibel situashonnan di krisis na diferente manera. Pa esnan ku ke pone nan konosementu na prueba, tin un ‘scavenger hunt’ pa gruponan di máksimo 5 persona. Partisipantenan lo kore rònt den outo mientras nan ta kumpli ku diferente tarea. Tin un premio máksimo di XCG. 2.500,- kèsh pa e grupo ganadó i diferente otro premio. Pa mas informashon tokante e ‘Ami Ta Prepará Scavenger Hunt’, reglanan di partisipashon i inskripshon por bishitá https://gobiernu.co/amitapreparascavengerhunt òf like i follow ‘Ami Ta Prepará’ riba Facebook i Instagram. Inskripshon ta posibel te ku 13 di òktober 2026.
Abo tambe ta prepará?
Prinsipalmente famia i muchanan lo siña di un manera aktivo pero dibertido, kiko preparashon pa un posibel krisis ta enserá. ‘Like i Follow’ Ami Ta Prepará riba medianan sosial òf sigui e páginanan di Gobièrnu di Kòrsou pa mas informashon. Un invitashon na tur habitante di Kòrsou pa bishitá ‘Ami Ta Prepará Expo’ riba djasabra, 17 di òktober 2026 na Brionplein, di 4’or di atardi te 9’or di anochi. Entrada ta grátis.
