Notisia

Willemstad- djamars 10 di sèptèmber a habri e aña parlamentario nobo. Gobernador sra. Lucille George-Wout den su disertashon a para ketu riba diferente tema i desaroyo. Pa lokual ta trata e Ministerio di Enseñansa, Siensia, Kultura i Deporte pa ku enseñansa ta konsentrá riba 4 punto:

• Un konsepto di lei nobo tokante enseñansa obligatorio pa garantisá e derechi di formashon di nos yunan i formashon pre-eskolar por medio di reorganisashon di ODIM-Organisashon Desaroyo Integral di Mucha. Un fundeshi sólido den infansia ta e yabi pa éksito den futuro;
• Den e kuadro di independisashon di skolnan púbiko pa bira skolnan magnétiko, ta imperativo pa sigui duna mas outonomia riba tereno finansiero pa por funshoná mihó;
• Ta kana e trayekto di optimalisá finansiamentu di estudio pa brinda hóbennan mihó akseso na enseñansa avansá akadémiko pagabel. Den kuadro aki ta a serando diferente akuerdo di entendimentu i tambe ta aserká estadonan, por ehèmpel Florida;
• Lo sigui ku evaluashon i adaptashon di diferente tipo di enseñansa i kuríkula e.o. pruebanan den gruponan 6 i 7 pa midi progreso di kada hóben i dunanan e sostén nesesario. Tambe kambionan den terminonan final di VSBO, AGO, HAVO, VWO, inisio di estudio nobo manera “hoveniersopleiding” i estudio pa instruktor di deporte.

Otro desaroyo sumamante importante den enseñansa ta ku Gobièrnu di Kòrsou ta introdusí di forma struktural e “VALUE-BASED EDUCATION”, inkorporando “norma i balor” den e diferente nivelnan di enseñansa pa influenshá nos forma sosial di komprondé i anda ku otro den nos sosiedat.

Riba tereno di Kultura a traha riba konsientisashon di nos komunidat i su kultura riko i diverso, entre otro nos rikesa musikal i kulinario. Den 2019 ta selebrá e Aña di Ka’i di Orgel i pa promé biaha a introdusí “premio Broertje Marshall” pa stimulá hóbennan nan pa presta na un nivel haltu i duna rèspèt na tur tipo di fishi. Den kuadro di e trayekto pa fortifiká nos identidat kompartí i konstrukshon di nashon ta trahando riba e tema di emansipashon di nos komunidat i dokumentashon di historia di sklabitut di Kòrsou.

Pa ku deporte ya a dal paso pa inkorporá moveshon i deporte den enseñansa di fundeshi i ta trahando riba eksplotashon duradero i optimal di e diferente sentronan deportivo.

*****************************************

MAS NOTISIA

Ministerio konserní: Enseñansa, Siensia, Kultura & Deporte