Notisia

Anunsio Premio Cola Debrot 2019

Geplaatst op 09 April 2019 dor di Ministerio Enseñansa, Siensia, Kultura & Deporte

Willemstad- Cola Debrotprijs, e “Premio Cola Debrot” ta un premio riba tereno kultural ku for di 1968 ta keda anualmente otorgá na un persona òf organisashon ku a hasi trabounan meritorio riba tereno di arte. Tin diferente kategoria ku ta ser premiá: architektura, arte visual, baile, folklor, literatura, músika, teater òf siensia. E aña aki a toka turno na e kategoria di “baile”.

E Premio Cola Debrot pa 2019 ta ser otorgá na sr. Adriano Cesáreo Jean Louis pa su esfuersonan grandi brindá riba tereno di baile. E proposishon a keda hasí dor di Konseho Kultural Kòrsou, ku tur aña di nobo ta instituí un komishon independiente pa skohe e ganador di e prestigioso premio.

Entregá di e premio ta tuma lugá riba 4 di mei, e fecha natal di Cola Debrot. E premio ta konsistí di un boton di oro representando e flor di larahá, un sertifikado i un suma.

Gobièrnu di Kòrsou ta felisitá sr. Jean Luis i su famia pa kere den Kòrsou, den positivismo i un konstrukshon sano di nos pais i ta yama danki alabes na Konseho Kultural Kòrsou pa un tremendo trabou.

Riba e potrètnan: sra. Veréle Ghering-Engels i sr. Micheal Newton di Konseho Kultural Kòrsou, minister di Kultura sra. Marilyn Alcalá-Wallé, sr. Adriano Cesáreo Jean Louis i famia i sra. Lizette Sambo-Velder Direktor di Sektor di Kultura i Deporte. 

************************************************************************

 

 

Ministerio konserní

• Enseñansa, Siensia, Kultura & Deporte