Notisia

Willemstad- Gobièrnu di Kòrsou ta partisipá ku Premio Cola Debrot di 2024 lo keda otorgá na sr. Ir. Michael Newton pa su esfuersonan grandi brindá riba tereno di arkitektura. Premio Cola Debrot ta un premio riba tereno kultural ku for di 1968 Gobièrnu di Kòrsou ta otorgá anualmente na un persona òf organisashon ku a hasi trabounan meritorio. Kada aña un kategoria ta na turno pa risibí e premio. E kategorianan ta: arkitektura, arte visual, baile, folklor, literatura, músika, teatro i siensia. E aña akí a toka turno na e kategoria di ‘arte visual’.

E proposishon tabata hasí pa Konseho Kultural Kòrsou ku tur aña di nobo komo komishon independiente ta proponé un nominado na Gobièrnu pa risibí e premio. E aña akí Konseho Kultural Kòrsou a presentá sr. Ir. Michael Newton komo nominado. Konseho di Minister a ratifiká e proposishon akí i ta felisitá sr. Newton ku e echo akí. Premio Cola Debrot ta konsistí di un boton di oro representando e flor di larahá, un sertifikado i un montante. 

Minister di Enseñansa, Siensia, Kultura i Deporte sr. Sithree van Heydoorn na nòmber di Gobièrnu ta gradisí sr. Newton, pa e echo di a kere den Kòrsou, i a protegé e arkitekturanan riba nivel haltu aki na Kòrsou. Pa medio di su ekspertisio ta solisitá sr. Newton pa duna konseho, hasi investigashon i skirbi plan di maneho pa diferente pais den eksterior. Sr. Newton ku su talento i positivismo, a duna di su parti pa yuda konstruí nos pais di un forma positivo. Komo parti di su karakterístika sr. Newton su ekspreshon den su generalidat i ekspreshon artístiko ta importante pa desaroyo di nos pais. P’esei, Gobièrnu ta agradesido pa su aporte balioso, spesialmente pa loke ta trata konservashon di nos arkitektura úniko den Karibe. 

 Gobièrnu di Kòrsou pa medio esaki ta yama danki tambe na Konseho Kultural Kòrsou pa un tremendo trabou. 

— 

KOMUNIKASHON 

*Riba e potrètnan athunto por tuma nota di momento ku minister Sithree van Heydoorn a informá sr. Michael Newton ku e premio Cola Debrot lo ta otorgá na su persona.