Apelashon na kompanianan di transporte pa evitá tránsito di vehíkulo pisa riba Koningin Julianabrug
Publiká riba
15 Ougùstùs 2024
Willemstad – Servisio pa Obra Públiko (OW) ta informá nos komunidat ku e últimamente a nota un oumentu di tráfiko di vehíkulo pisa riba Koningin Julianabrug.
E brùg aki a ser diseñá 50 aña pasá pa soportá vehíkulo ku máksimo di 45 tòn, kual ta inkluí e peso di vehíkulo i karga. Si surpasá e límitenan aki konstantemente, esaki por kousa daño na parti kritiko di e struktura di brùg i e kapa di asfalt. Esaki na su turno, eventualmente ta nifiká ku e brùg, ku ta un infrastruktura vital pa nos isla i di gran balor ekonómiko, lo tin ku sera pa mantenshon.
Pa evitá tal konsekuensia, OW ta hasi un apelashon serka kompania di kontratista i transporte pa evitá pasa riba e brùg ku karga pisa. Ta rekomendá pa usa e ruta alternativo rondó di Schottegat pa e tipo di transporte aki.
OW huntu ku Polis di Tráfiko, lo intensifiká kontrolnan riba brùg, i lo tuma medidanan severo pa mantené seguridat i integridat di brùg.
