Apelashon pa renobashon di pèrmit di bùs i taksi - Informashon tokante Gobièrnu di Kòrsou Bo opinion

Notisia

Apelashon pa renobashon di pèrmit di bùs i taksi

Geplaatst op 10 June 2020 dor di Ministerio Tráfiko, Transporte i Planifikashon Urbano

WILLEMSTAD – Servisio pa Tráfiko i Transporte (UOVV) ta hasi un apelashon na tur shofùr di bùs i taksista pa bin renobá nan pèrmit. UOVV ta duna oportunidat te ku fin di yüni pa por hasi petishon pa prolongashon di e pèrmit. Por apliká via e-mail na tp.uovv@gobiernu.cw òf yama 839-2143/839-2147.

‘Landsverordening Personenvervoer’ (A.B. NO.7, 1992) artíkulo 2 ta indiká ku ora e pèrmit a kaduká (pues su fecha di balides a pasa), esaki ta nifiká ku e pèrmit ta inválido. Te na e momentunan aki UOVV tin un kantidat di 132 pèrmit di bus i 68 pèrmit di taksi ku a kaduká.

Na komienso di e aña aki UOVV a manda un karta pa tur e personanan ku nan pèrmit a kaduká. Den esaki a indiká ku mester kumpli ku e lei di transporte públiko. Tambe a atvertí ku si no hasi petishon pa prolongashon di e pèrmit, por kore e rísiko ku Minister di Tráfiko, Transporte i Planifikashon Urbano (VVRP) lo no por bai di akuerdo ku un prolongashon di e pèrmit mirando ku e persona ku a kore sin pèrmit válido, a kore di forma ilegal kual ta un echo kastigabel.

Ta duna pues tur esnan ku no a entregá e petishon pa prolongashon ainda te ku fin di yüni 2020 pa entregá un petishon. Despues di e fecha aki, lo no trata niun petishon di prolongashon retrasá mas i lo ninga tur petishon ku bin despues. Pa loke ta e dokumentonan nesesario pa petishon di prolongashon, a tuma e desishon ku por entregá e petishon huntu ku un kopia di un petishon pa “Verklaring omtrent Gedrag” pa no tarda e proseso. Esun ku hasi e petishon di prolongashon lo mester yena un deklarashon ku e no tabata den kontakto ku hustisia. Si konstatá ku e deklarashon no ta kuadra ku bèrdat, por revoká e pèrmit. E deklarashon aki tambe ta forma parti di e proseso di e petishon pa prolongashon.

UOVV ta hasi un yamada urgente pa bin atendé e petishon mas pronto posibel i ta para kla pa yuda. Por yama pa kualke informashon nesesario.

Ministerio konserní