Publiká riba 30 Ougùstùs 2018
Willemstad – Outoridat di Aviashon Sivil di Kòrsou ta hasi un apelashon serio na tur usuario di drones pa no bula drones den área di Parasasa, pa mas eksakto riba edifisio nan di World Trade Center i Clarion Hotel i sigur no riba e área di presentashon di e artista nan durante e aktividatnan di Curaçao North Sea Jazz 2018 di dianan 30 i 31 di ougùstùs i 1 di sèptèmber 2018. Ta pidi pa no bula ku drones durante e festival ariba menshoná.
E motibu di e medida aki ta pa garantisá seguridat di tur persona ku lo bishita e aktividat aki mirando ku lo tin basta artista konosí ku lo presentá. Un drone por eksperensiá un mal funshonamentu i kai den públiko. Ta antisipá ku tin un kantidat grandi di persona ta bishita e aktividatnan i e peliger tei ku si pa un òf otro motibu e drone kai e por kousa daño na hende i material.
Tur esaki ta pa garantisá seguridat durante e gran evento di Curaçao North Sea Jazz 2018.
