Apertura aña parlamentario nobo - Informashon tokante Gobièrnu di Kòrsou Bo opinion

Notisia

Apertura aña parlamentario nobo

Geplaatst op 11 September 2018 dor di Ministerio Asuntunan General i Promé Minister

Señor presidente, honorabel miembronan di parlamentu,

Komienso di kada aña parlamentario ta un momentu di importansia nashonal kaminda Gobièrnu, Parlamentu i komunidat kompletu por para ketu pa evaluá, reflehá i fihá propósito pa e aña benidero.

Un momentu pa nos evaluá e eventonan di e último aña, algun di e logronan kompartí, pero tambe e desafionan ku nos mester a enfrentá. Pa huntu nos reflehá riba e funshon di gobernashon i su resultadonan na bienestar di kada siudadano. I pa prinsipalmente nos wak dilanti i definí di ki forma Gobernashon lo kontinuá pa karga su responsabilidat, pone prioridat i hasi eskohonan fundamental pa logra progreso di nos nashon.

Si nos reflehá na unda nos ta awor aki komo pais, ta un realidat duru ku Kòrsou ta pasando den un periodo ekstremadamente difísil. Un situashon ku no a nanse di ayera pa awe. For di na momentu ku Gobièrnu a tuma rienda di gobernashon di nos pais aña pasá i a hasi un análisis di e situashon di e tempu ei, ya diferente reto grandi tabata konosí;

  • situashon finansiero di Gobièrnu ta sumamente frágil. Na final di 2017 a bira konosí ku lo sera e aña ku un défisit di 116,8 mion.
  • Ekonomia di Kòrsou a kremp signifikantemente e último añanan aki i na 2017 ku 1,7 %. Esaki a resultá den un oumentu alarmante di personanan ku a pèrdè empleo. Algu ku Gobièrnu i komunidat ta sinti i ta biba ku né.
  • E inseguridat pa ku kontinuashon di refineria i tambe futuro di sektor finansiero. Ámbos sektor netamente ta sektornan produktivo i ainda di sumo importansia pa nos ekonomia, pa generá divisa i tambe kupo di trabou.
  • Banda di e desafionan finansiero-ekonómiko, ta sobre salí e nesesidat agudo pa hasi invershonnan kuantioso den bienestar sosial, salubridat, enseñansa i formashon di nos komunidat.

E realidat sigur ta – ku nos- komo un isla chikí den desaroyo i un pais yòn ku kapasidatnan hopi limitá pa atendé asta sierto di nos propio retonan — nos a keda enfrentá ku diferente sirkunstansia ku ta afektá nos profundamente, pero ku alabes ta faktornan eksterno ku nos no tin kompletamente den nos man òf nos no por influensiá ni remediá di inmediato.

E echo mas palpabel ta e situashon krítiko na Venezuela — un di nos partnernan ekonómiko prinsipal — i e eventonan di último lunanan ku tur hende a biba kuné:

un kaida kompletu di turismo for di Venezuela, un siere di frontera, e ‘claim’ riba PDVSA kual a afektá Refineria Isla i un fluho di migrashon di diferente persona loke tambe ta buta preshon riba nos rekursonan. E situashon aki tabatin un efekto grandi riba diferente sektor; aktividatnan petrolero, marítimo i logístiko, turismo i konektividata éreo.
Ainda mester kaba di kuantifiká e impakto di esaki den su totalidat, pero nos sa ku esaki ta supstansial.
Di otro banda, nos merkado lokal tambe a i ta eksperensiá kambionan profundo ku a resultá den un kontrakshon di ekonomia.

Sr. Presidente,
Ku e noshon ku no ta tur kos lo por atendé pareu, i ku lo mester bini ku akshonnan konkreto a korto plaso i intervenshonnan pa harma un fundeshi fuerte pa término largu, Gobièrnu a traha ku determinashon pa enfrentá e retonan mas agudo ku e instrumentonan ku e tin.

Un ehèmpel konkreto ta ku 4 minister i ministerio ta bini huntu regularmente pa atendé na un manera mas lihé i efisiente proyektonan di invershon identifiká, ku ta trayektonan di invershonnan kuantioso ku konkretamente por duna empuhe na nos ekonomia a korto plaso.

E posibel impakto di tipo di invershonnan aki a keda probá den pasado. Despues di e situashon krítiko den nos pais na 2004, a intensifiká e programa di invershon i ku konstrukshon di algun hotel i proyekto komersial a yuda aselerá rekuperashon ekonómiko den añanan siguiente, di 2006-2008.

Evaluando e situashon finansiero, Gobièrnu a skohe pa wak den su propio presupuesto na aña 2017 i 2018 kon por mengua e défisit. Na fin di aña 2017 a disidí di wanta ku algun gastu. Na 2018 Gobièrnu a presentá un presupuesto ku ya ta minimalisá gastunan, ekonomisá riba vários puesto i a introdusí akshon pa subi entrada dor di kobra plakanan ku tin riba kaya. Ku e akshonnan aki ta premirá ku ta sera presupuesto di 2018 i ku lo rekobrá un parti grandi di e défisit di 2017.

Pero entre otro dor di falta di kresementu ekonómiko den 2018,  atrobe entrada di Gobièrnu ta keda impaktá. Pues Gobièrnu kier evaluá e posibilidat pa rekonsiderá e periodo pa rekobrá e défisit di 2017 den e añanan benidero, pa duna e espasio pa netamente por hasi e invershonnan i reformanan nesesario kual lo ta determinante pa un kambio di direkshon den nos pais.

Vishon i mishon di Gobièrnu ta pa realisá rekuperashon struktural i desaroyo duradero. Nos a yega na un punto desisivo kaminda lokual tin mester mas ku nunka awor ta invershon i mas invershon pa krea kuponan di trabou i duna sosten na esnan mas debil den komunidat.

Pues banda di e akshonnan kontinuo a korto plaso, Gobièrnu ta komprometé pa hasi e eskohonan fundamental ku ta nesesario. No e desishonnan pa remediá djis pa tanten, ni pa e próksimo 3 añanan, pero desishonnan pa realisá riba termino largu un futuro ku ta brinda mas perspektiva na tur nos siudadanonan.

Pa logra esaki Gobièrnu tin un plan integral i amplio pa mehorá di forma struktural nos finansa públiko, nos proseduranan i funshonamentu di aparato públiko i sektornan ekonómiko, pa alkansá ku:

  • presupuesto di Gobièrnu por ta balansá i Gobièrnu tin rekurso pa ehekutá su maneho, e.o su maneho sosial
  • Gobièrnu por hasi e invershonnan nesesario i fasilitá aktividatnan ekonómiko
  • Por tin un sektor públiko agil ku un funshonamentu optimal prepará pa futuro.

Pa ku e pilar di maneho di finansa, lo bini revishon di nos proseso presupuestario. Entre otro lo inisiá maneho mas stratégiko di Gobièrnu su propriedatnan, inmòbil, tereno i otro ‘bien nan’.  Miho maneho di e ‘bien nan’ aki por kontribuí pa trese entrada pa Gobièrnu ku seguidamente por usa pa hasi otro invershonnan públiko.

Miho maneho di finansa na un manera duradero ta bai man na man ku un rekuperashon ekonómiko supstansial, e di dos pilar. Asina por mantené e siklo di kresementu i desaroyo sosial-ekonómiko. Elemento básiko di e rekuperashon ta ku mester fasilitá invershonnan privá pa logra empleo inisial i empleo struktural. Manera menshoná anteriormente, ya diferente ministerio a uni forsa pa kristalisá esaki. Invershonnan públiko mester komplementá invershonnan privá i yuda fomentá desaroyo sosial i alsa kalidat di bida. Aki por pensa por ehèmpel riba areanan manera bibienda, desaroyo di bario, seguridat i mobilidat.
Pa menshoná algun ehèmpel di desaroyonan ku den e próksimo 3 añanan aki, di 2019 pa 2022, Gobièrnu lo trata na realisá:

Desaroyo den area di Ref
Invershonnan privá na balor di 90 mion florin, entre otro den hotèl i kompleho deportivo, kompaña pa un invershon públiko di mas o menos 38 mion.
Esaki lo resultá den empleo struktural di 170-200 kupo di trabou.

Desaroyo den area di Punda, Scharloo i Pietermaai
Invershonnan privá den proyektonan hotelero nobo i eksistente na balor di total 455 mion i un invershon públiko di mas o menos 53 mion. Empleo struktural: un balotashon di 1000 kupo di trabou.

Tambe Gobièrnu kier fasilitá invershonnan públiko den areanan ku lo tin un efekto katalisador riba kresementu ekonómiko, entre otro:

  • Realisashon di e masterplan di turismo.
  • Desaroyo di e sektor di Agrikultura, Krio di Bestia i Peska.
  • Renobashon di nos infrastruktura.

Por resumí ku den e próksimo añanan Gobièrnu ta premirá mas ku 500 mion di invershonnan privá i a kalkulá ku mester hasi mas o menos 165 mion di invershon públiko. Banda di e inisiativanan menshoná aki riba tin diferente otro inisiativa, algun mas leu ku otro.
 

Pa Gobièrnu por guia e trayektonan di kambio ku nos pais mester den e próksimo añanan, e di 3 pilar lo ta di importansia: revisá i transformá funshonamentu di aparato gubernamental. Ku prosesonan mas efisiente pa duna servisio na komunidat, miho posibilidatnan pa desaroyo i invershon den kapasidat di aparato públiko, Gobièrnu por kana dilanti i duna kontenido na e kompromiso ku e tin ku e siudadano pa dia aden i dia afó traha riba un mihó pais.

Gobièrnu lo bini ku un struktura agil ku diferente ekspertisio pa guia e intervenshonnan segun e 3 pilarnan aki i pa enkaminá e proseso di kambio aki di un manera konsistente.

Transformashon nunka ta fasil i tampoko inmediato. Pero pa bòltu nos situashon finansiero-ekonómiko, lo mester tuma netamente pasonan definitivo pa yega na un transformashon mas amplio, stratégiko i duradero.

E tres pilarnan ku a kaba di deskribí — maneho di finansa sano i stabil, kapital humano i desaroyo sosial-ekonómiko — ta forma e base integral pa trese reforma i inovashon ku ta alinia na e metanan amplio ku tin inkluí den e Programa di Gobernashon “Pa realisá nos máksimo potensial 2017-2021”.

Gobièrnu di Kòrsou, no opstante tur reto i kontratempo, ta trahando ku vishon i perseveransia riba diferente akshon pa kumpli ku e Programa di Gobernashon i pa logra ku kada siudadano komo individual i nos pais komo un kolektivo, por haña oportunidat pa realisá su máksimo potensial.

 

Sr. Presidente, permití mi awor kubri algun di e metanan mas importante den e Programa di Gobernashon ku lo ta parti di e maneho di kada ministerio den e próksimo aña 2018-2019.

Ministerio di Finansa ya a inisiá mas kolaborashon interministerial di forma ku por sostené tur ministerio mihó ku optimalisashon di maneho di Finansa. Na Ministerio di Finansa tambe ta reforsando algun departamentu i ya e proseso pa reklutá un direktor finansiero, ‘auditors’ i kontroladó finansiero a kuminsa.

 Pa logra un presupuesto di mas aña realístiko, Gobièrnu mester ta sigur di su entrada. Tin diferente trayekto den implementashon pa optimalisá i modernisá e proseso di kolekshon i pago di impuesto. Gobièrnu ta revisá tambe ki tipo di instrumentonan fiskal por ofresé pa empuhá proyektonan ekonómiko i drecha posishon kompetitivo di Kòrsou. Ya a stipulá ku pa proyektonan grandi ku kumpli ku algun kriterio lo por ekspandé e ‘tax holiday’ i eliminá pago di OB pa un temporada. Nos sentro di siudat lo bira un area piloto “Duty Free”, pa atraé turista, prinsipalmente di krusero.

Sr. Presidente,
Ministerio di Desaroyo Ekonómiko ta tumando akshonnan konkreto pa sigui kristalisá desaroyo ekonómiko inklusivo. Pa eliminashon di ‘Red Tape’, un punto di atenshon ya pa basta aña kaba, ta ku Gobièrnu a lanta un komishon interministerial ku representashon di sektor privá, ku ta trahando riba diferente proposishon pa yega na un proseso mas efisiente i transparente pa empresario i invershonistanan.

Lo kontinuá ku implementashon di Masterplan di Turismo pa sigui fortifiká Turismo komo un pilar ekonómiko stabil. Den lunanan benidero lo anunsiá kadenanan hotelero ku lo establesé na Kòrsou i duna un ‘boost’ grandi na e sektor aki.  Gobièrnu di Kòrsou ta orguyoso ku ya pa aña 2018 a logra krese nos ‘airlift’ ku mas di 40 mil stul, i ku e kantidat di estadia pero tambe e kantidat di turista krusero a subi awor ku e di dos pir, Tula pir, ta operashonal.

Ministerio di Desaroyo Ekonómiko a kompletá revishon di e maneho pa kompanianan chikí i mediano i lo sigui fasilitá insentivonan balioso, manera e.o mikro-fiansa, treinen i sosten via e “Small Business Support Centre” pa asina stimulá mas empresa i mas kupo di trabou. Ku lansamentu di e plataformanan “Smart Nation i “Green Growth for Jobs” lo traha riba inisiativanan pa krea sektornan ekonómiko nobo ku ta inovativo i duradero.

Na mei 2018, Ministerio di Desaroyo Ekonómiko a organisá e promé ‘National Export Week’. Huntu ku partnernan den diferente sektor awor lo sigui traha pa yega na un strategia nashonal pa oumentá konosementu i subi produkshon i eksportashon den diferente sektor. Via di RVO (Rijksdienst voor Ondernemend Nederland) awor empresanan di Kòrsou tambe lo bini na remarke pa sierto insentivo i supsidio pa eksportá pa diferente region.

Di sumo importansia tabata ratifikashon di e maneho di energia ku ta deliniá un vishon riba termino largu pa ku produkshon, distribushon i konsumo di energia. Pa 2035, Kòrsou lo mester usa 50% energia duradero, loke lo mester nifiká un bahada den gastunan energétiko. Gobièrnu di Kòrsou, riba termino korto, ta kompromete pa establesé un struktura efektivo i e regulashonnan nesesario pa transformá nos sektor di energia. Ya a baha e montante ku mester kalkulá pa generá energia solar (asina yamá ‘solar tax’).

Sr.Presidente,
Un proyekto magno ku porfin despues di basta aña, a inisiá na fin di 2017 i komienso di 2018, ta e invershonnan di Fondo Oropeo (EDF) 10. Esaki lo resultá den infrastruktura nobo den 4 bario: E bario di Nieuw Nederland ku entre otro kaya i ret di desagwe nobo, e bario di Sapate ku adishonalmente un sentro di bario multifunshonal, na Tera Kora lo traha kasnan di famia i plenchi pa mucha hunga inkluso kaya i asera i na Kortijn lo bini area pa rekreashon i fasilidatnan deportivo. Ya e trabounan pa EDF 11 ta kana ku diligensia di forma ku Kòrsou por hasi invershon den fortalesé nos infrastruktura i den sektor di energia. Tambe a logra ku na 2019 Kòrsou lo okupá un puesto prinsipal den negosiashonnan ku Union Oropeo komo Presidente di OCTA (e teritorionan ultramar). Esaki lo ta esensial pa sòru pa Kòrsou den futuro lo por benefisia di un relashon fuerte ku Union Oropeo.

Den e ultimo aña Kòrsou tabata anfitrion i inisiadó di diferente enkuentro na nivel haltu ku Promé Ministernan di Aruba i Sint-Maarten; entre otro pa yega na palabrashonnan konkreto pa sosten si tin kualke kalamidat òf desaster den region. Pronto lo bolbe duna kontenido na e departamento eksistente di Relashonnan den Reino pa Kòrsou por implementá un maneho mas dirigí i fomentá mas kolaborashon ku tur pais den Reino.

Kas di Kòrsou na ‘Den Haag’ ya ta ehekutando un plan stratégiko pa den e próksimo añanan optimalisá funshonamentu di forma ku e por ta un punto di lansa pa Yunan di Kòrsou na Hulanda pero tambe pa Hulandesnan ku ta interesá den hasi negoshi ku Kòrsou. Despues di e eksitoso lansamentu na yüni di e konferensia di invershon “Bon Biní for Business”, proksimamente,  na yanüari 2019,  lo tin e di dos konferensia na Kòrsou pa logra ‘match’ invershonistanan ku areanan di interes krusial pa Kòrsou.

Tambe a traha riba un revishon di maneho di Relashonnan Eksterior ku enfoke riba algun pais klave p’asina fortifiká kolaborashon, invershon i traspaso di konosementu. Riba nivel haltu, ya kaba tabatin enkuentro ku Nashonnan Uní, inkluso ku Sekretario General Gutierres i Caricom pa papia riba e interes i nesesidatnan di Kòrsou komo un Small Island Developing State (SIDS) den region Karibense.

Kòrsou ta trahando den estrecho kolaborashon ku Nashonnan Uní pa  implementashon di e metanan mundial pa desaroyo durabel, konosí komo Sustainable Development Goals òf Global Goals. Despues di un analisís di tur nos plannan i programanan nashonal, pronto nos lo tin un SDG Roadmap pa fihá e areanan ku Kòrsou lo mester duna prioridat na kaminda pa 2030. E kuadro global aki lo yuda Gobièrnu determiná maneho i intervenshonnan prioritario, ‘benchmark’ esta hasi evaluashon komparativo ku otro pais, eliminá ‘bottlenecks’ i midi progreso a base di indikadónan i di data.

Sr. Presidente,
Kòrsou pronto lo konosé un buro pa stimulá  “Wellness” ku lo ta enkargá ku desaroyá i implementá programanan pa elevá bienestar riba tereno físiko, sosial-emoshonal, intelektual, spiritual, di nutrishon i di medioambiente. Ku esaki, Gobièrnu di Kòrsou lo traha strukturalmente riba prevenshon ku e meta pa stimulá un komunidat mas salú, kual konsekuentemente lo resultá den menos gastu di salubridat.

Den ultimo aña aki Ministerio di Salú, Medio Ambiente i Naturalesa tambe a lansa e proyekto “Kunukito Hidropóniko” den koperashon ku diferente instansia, e.o Universidat di La Guajira di Colombia  i Adeck. Ku e proyekto piloto aki, lo investigá diferente forma di agrikultura p’asina kontribuí na krese produkshon di nos mes kuminda i ekspandé e sektor di agrikultura.

Konstrukshon di e Hospital Nobo, manera ta konosí, a tuma bastante espasio finansiero i e proseso di transishon no tabata sin kontratempu. Gobièrnu tin e kompromiso pa guia un bon transishon pa nos Hospital Nobo ku lo brinda kuido mediko modèrno i mas efisiente ku atenshon pa nesesidat di e pashènt. Un hospital di futuro ku por fasilitá kolaborashon den region.

Den arena di Medio Ambiente tambe tin diferente trayekto pa revisá of krea maneho dirigí riba konservá bida bou di laman i kuido di nos ekosistema riba tera. Ku establesimentu di X-team,  un tim multidisiplinario, Gobièrnu a manda un mensahe ku porfin lo bini kontròl i sanshon pa esnan ku ta sushá nos isla, nos kas.

Sr. Presidente,
Maneho di Minister di Hustisia ta dirigí riba 3 pilar: prevenshon, represhon i resosialisashon. E liña kòrá den tur esaki ta e vishon pa yega na un Kòrsou kaminda komunidat por sinti su mes trankil i sigur.

E aña aki a kuminsá ku Konsulta di Bario kaminda e ministerio, Minister i Polis ta drenta bario pa huntu ku habitantenan traha palabrashonnan pa halsa e sentido di seguridat den e área. E trayekto aki a duna resultadonan alentador. Ya tin barionan kaminda habitantenan a uní i esaki a trese kuné tambe ku insidentenan den e bario a baha konsiderablemente. Banda di esaki tin vários trayekto ku e enfoke pa guia i empoderá hóbennan pa prevení nan di kai den man di hustisia. Den e kuadro aki, via di fondo di kriminalidat a supsidia e proyekto Halt di fundashon Ambulante Justitiële Jeugdzorg Curaçao, ku lo ta un trayekto amplio dirigí riba prevenshon bou di nos hóbennan.

Ministerio di Hustisia a establesé un grupo di trabou pa traha riba trayektonan di resosialisashon, p’asina duna oportunidatnan pa sigui kurso i siña fishi den Sentro di Detenshon i Korekshon Kòrsou, pero tambe pa duna e guia nesesario na èks-detenidonan ku mester re-integrá den sosiedat.

Ku establesimentu di Sentro di Akshon Kòrsou a logra un kolaborashon muchu mas intensivo, efektivo i di forma integral entre diferente instansia den e kadena hudisial pa logra mehorá investigashon i mantenshon di òrdu. E esfuersonan aki ta dunando fruta: segun sifranan, e krimennan di impakto haltu riba komunidat a baha ku entre 40 i 53%. Tambe lo sigui enfoká riba kita armanan for di riba kaya. Gobièrnu di Kòrsou ta kontentu di mira e desaroyo aki i kier enkurasha instansianan hudisial pa sigui ku e bon trabou! Alabes ta na nos komunidat kompletu pa yuda opservá, notifiká i evitá ilegalidat i kriminalidat i logra e trankilidat ku Kòrsou mester.

Akshonnan pa halsa e efektividat i kapasidat di nos kuerpo Polisial tabata e  rekrutashon di 72 polis nobo (den proseso), un maneho dirigí riba aktividatnan (evenementenbeleid) i e foko riba aktividatnan nukleo den kuadro di seguridat nashonal. Ademas ta trahando duru riba ekipá skol di polis i kuerpo polisial pa asina sigui halsa kalidat di servisio di nos kuerpo den nan trabou di sirbi i proteha.

Ministerio di Hustisia tin atenshon tambe pa e situashon di migrashon na Kòrsou, spesífikamente di personanan indokumentá for di Venezuela pa Kòrsou. Punto di salida ta ku Kòrsou ta aplikando un proseso pa evaluá si personanan mester di protekshon i pa ofresé protekshon na personanan ku bin na remarke pa esaki. Lo sigui kolaborá den Reino i ku instansianan internashonal pa tin un proseso ku ta kana manera mester.

Sr. Presidente,
Ta un echo ku den e periodo finansiero-ekonómiko difisil ku Kòrsou ta pasando aden, diferente negoshi mester a despedí di nan empleadonan. Mientras ku ta trahando duru pa rekuperá kuponan di trabou riba termino kòrtiku, Ministerio di Desaroyo Sosial, Labor i Bienestar ta den proseso pa reforsá su Sentro di Trabou eksistente. E Sentro di Trabou aki lo ta un sentro kaminda ku personanan por pasa pa haña e sosten nesesario despues ku nan a pèrdè trabou, nan por haña guia den buskeda di funshonnan habrí ku ta pas ku nan profil i tambe haña konseho riba e posibilidatnan pa kuminsa un propio negoshi. E Sentro di Trabou aki lo ta operashonal pronto.

Ministerio di Desaroyo Sosial, Labor i Bienestar tambe tin na su enkargo pa establesé e Plataforma Derechi di Mucha den kolaborashon ku otro Ministerionan konserní. Ku esaki lo traha riba fortifikashon di konosementu di kiko ta Derechi di Mucha den diferente sektor i pa akoplá maneho ku ta dirigí riba e mucha i e hóben. Na aprel 2018, Gobièrnu di Kòrsou a aprobá e Plan Nashonal kontra violensia relashonal i abusu di mucha ku a ser formula den estrecho kolaborashon ku NGO-nan. Awor lo sigui ku implementashon di un forma integral.

Pa komienso di aña 2019, Kòrsou lo konose un Instituto Nashonal di Fishi, ku lo ta enkargá ku desaroyo di sektor laboral (workforce development). Huntu ku sektor privá  i sindikalismo lo duna kontenido na e Instituto Nashonal di Fishi p’asina prepará personanan ku e kompetensianan nesesario pa por ehersé trabou na nivel. Dor di konektá ku akreditashon internashonal lo mantené un grado di profeshonalismo haltu i e posibilidat pa hasi interkambio di trabou den eksterior. Ta apoderando inspekshon pa hasi e kontròlnan nesesario i for di fin di 2017 MEO, SOAW i OWCS den un forma interministerial ta trahando riba un planifikashon integral di e forsa laboral (manpower planning).

Banda di e metanan ya menshoná, Ministerio di Desaroyo Sosial, Labor i Bienestar lo sigui traha den i huntu ku barionan pa stimulá desaroyo sosial i pa yuda halsa kalidat di bida den barionan rònt Kòrsou.

Sr. Presidente,
Ministerio di Enseñansa, Siensia, Kultura i Deporte a lansa den e periodo ku a pasa diferente diálogo i interkambio ku partnernan den e sektor di Enseñansa, entre otro riba e tema di seguridat na skol;  e tema di igualdat di  género; i e tema di idioma den enseñansa.

E meta ta pa na plaso largo yega na un trayektoria komun pa implementá diferente  mehorashon den nos sistema di enseñansa riba kada nivel: for di alsa kalidat i tambe partisipashon den edukashon pre-eskolar di 0-4 aña, sigurá mihó konekshon entre diferente nivel di enseñansa, partikularmente den enseñansa di preparashon i di fishi, te na stimulá un maneho pa investigashon i inovashon den enseñansa superior huntu ku e sektor en kestion.

Primeramente tin atenshon pa reforsá e Ministerio di Enseñansa, Siensia, Kultura i Deporte i fortifiká e funshon finansiero i di statístik. Tambe tin un grupo di trabou ku ta inventarisando kua ta e kambionan den lei ku ta nesesario.

Aktualmente e tim di ehekushon di Enseñansa Obligatorio (Leerplicht) ta trahando riba un trayekto di mehorashon bou di e nòmber “Ban kuida futuro di nos yunan.” Un otro paso den e direkshon deseá ta e establesimentu di un instansia konforme e Konseho pa Enseñansa i Merkado Laboral (Raad voor Onderwijs en Arbeidsmarkt) i alabes un Registro Sentral (Centraal Register) pa un i tur por konsultá ku e registro pa sa kua estudionan ta rekonosé dor di gobièrnu.

Resultadonan di enseñansa ta mas positivo ora ku mayornan tin un ròl aktivo den edukashon di nan yunan. Gobièrnu ta mira komo su tarea pa trata na fasilitá aktivamente partisipashon di mayornan na skolnan i pa embolbí representashon di mayornan den desishonnan pa ku enseñansa.

Den kuadro di maneho di Deporte a hasi invershonnan kuantioso pa mehorá fasilidatnan deportivo i tambe logra partisipashon di nos atletanan na kompetensianan regional i internashonal. Algun skol na Kòrsou ya a sera konosí ku lidernan di deporte nobo pa logra amplia e base di deporte i moveshon na skolnan.Gobièrnu lo sigui sostené esaki konforme e área di edukashon “Deporte i Moveshon”.

Ku aktividatnan manera e instalashon di un premio kulinario “Broertje Marshall”, kreashon di un zona kultural, instalashon di un korona di historia rondó di nos bandera, proklamashon di e aña di Ka’i òrgel 2019 i ku speransa di pronto tin  un Teatro Nashonal Nobo, Sektor di Kultura ta boga pa sigui alsa konsiensia históriko-kultural, kual ta habri porta pa desaroyo di siudadanonan ku ta konsiente di nan mes, nan herensia i nan potensial.

Sr. Presidente,
Gobièrnu di Kòrsou ta konsiente ku mester bini ku solushon pa fasilitá mas bibienda pagabel pa famia i a dediká su mes pa yega na un lista aktualisa di e nesesidat, di forma ku por tuma akshon ku mas resultado. Bibienda ta keda un punto di lansa mirando e nesesidat grandi den komunidat.

Den bista di e evaluashonnan ku lo tuma lugá den 2019 pa ku nos sektor aereo, Ministerio di Trafiko,  Transporte, i Planifikashon Urbano i Outoridat di Aviashon ta trahando duru pa kumpli ku tur rekisito i a pone mas rekurso i kapasidat disponibel. Kòrsou tin un oportunidat pa yega e status di Kategoria 1 di Federal Aviation Authority bèk i lo traha dediká pa por logra esaki. Un parti di esei ta enserá hasi e adaptashonnan di lei i regulashon ku ta nesesario, tambe pa sektor marítimo.

Seguridat den Trafiko mester haña mas atenshon den komunidat kompletu. P’esei Gobièrnu a instalá un plataforma interministerial i a dediká un siman spesial na seguridat di tráfiko kaminda lo desplegá diferente aktividat pa alsa konsientisashon di un trafiko sigur. Ya a trese kambio den infrastruktura den areanan kaminda mester ta mas kouteloso, p’asina influensiá ku tur outomobilista ta mas na altura di e riesgonan i por evita aksidente i asta pèrdida di bida.

Ministerio di Trafiko, Transporte, i Planifikashon Urbano ta trahando ku United Nations Office for Project Services, un organisashon di proyekto di Nashonnan Uní pa hasi un evaluashon di nos infrastruktura. Esaki a resultá den un rapòrt ekstenso riba algun area di mehorashon ku Gobièrnu di Kòrsou mester tin atenshon p’e. Un area di prioridat den e aña benidero ta pa yega na un plan pa mihó maneho di awa shushi i di kloaka. Ministerio di Trafiko, Transporte, i Planifikashon Urbano tambe lo djòin forsa komo un di e promé ministerionan, ku e kompania di inovashon renombrá TNO, pa analisá mobilidat i bin ku rekomendashon pa nos sistema di transporte públiko.

Sr. Presidente,
Manera ya menshoná anteriormente, Gobièrnu a duna prioridat na drecha funshonamentu di Gobièrnu mes den e próksimo añanan ku implementashon di un plan integral ku enfoke riba adaptashon i mehorashon di struktura, proseso i instrumentonan den e areanan di:

  • maneho di Finansa,
  • optimalisashon di logistika i servisio fasilitario,
  • maneho di Rekurso Humano,
  • uso di Teknologia (ICT) i
  • bon gobernashon i integridat.

Den último lunanan ya a enkaminá e proseso pa lanta un ofisina di integridat ku lo ta un punto sentral pa hasi investigashon riba integridat den gobièrnu i tambe pa intervení kaminda ta nesesario. Funshonarionan di diferente ministerio ya a haña informashon di e ofisina di integridat i e kodigo di kondukta resien adoptá ku ta preskribí e kondukta deseá pa tur amtenar. Bon Gobernashon ta kana man na man ku un demokrasia fuerte. P’esei sigur lo finalisá e proseso pa independisá e Konseho Supremo Elektoral pa garantisá ku kada siudadano por ehersé e derechi demokrátiko di vota ora yega su turno.

Gobièrnu kier invertí mas den desaroyo personal i kapasitashon di funshonarionan. E aña aki mes lo inisiá e programa pilóto ‘Talento’ kaminda koleganan di 4 ministerio lo partisipá den un trayekto di treinen, mentorship, coaching i praktika.

Ministerio di Gobernashon, Planifikashon i Servisio Públiko tambe a entamá diferente proyekto pa ekspandé nos kapasidatnan di E-government i pa hasi e servisio na públiko mas aksesibel, plasentero i efisiente. Intenshon ta pa den futuro serkano ekspandé e proyekto aki.

Sr. Presidente, honorabel miembronan di parlamento,
Por dedusi for di e relato amplio aki, ku anke tin retonan enorme, Gobièrnu di Kòrsou ta komprometé i dediká na atendé ku temanan di importansia pa nos pais, i ta trahando na un manera interministerial i integral pa tuma desishonnan klave.

Gobièrnu di Kòrsou ta reflehá riba un periodo ku a konosé su inkietutnan, pero ta reafirmá ku Gobièrnu semper lo ta disponibel pa sinta na mesa, skucha, deliberá, dialogá pa yega na otro i embolbí komunidat mas tantu posibel. E prinsipio fundamental ta keda ku ta ku konfiansa den otro i solamente #huntu nos por enfrentá i supersá kualke reto i tradusi esaki den posibilidat

Ministerio konserní