Publiká riba 03 Desèmber 2020
Willemstad – Den e último lunanan tras di lomba Ministerio di Desaroyo Sosial, Labor i Bienestar (SOAW) a bini ta brinda sosten adishonal na komunidat, en partikular na esnan ku a haña nan mes den un situashon sosial-ekonómiko inesperá, kousá pa e pandemia COVID-19. Relashoná ku esaki, Ministerio di SOAW ke partisipá e siguiente informashon importante:
Apertura di formulario pa aplikashonnan nobo pa Sosten Laboral
E formulario di petishon pa Sosten Laboral ta habri bèk, djaluna 7 di desèmber 2020, pa duna oportunidat na tur hende ku a pèrdè trabou den luna di novèmber i desèmber 2020. Bishitá www.fondodisosten.org pa yena bo petishon. E formulario ta sera bèk, djaluna 21 di desèmber 2020. E kompensashon akí ta destiná pa personanan ku, debí na e medidanan obligatorio relatá na COVID-19, a pèrdè nan trabou después di e fecha 15 di mart 2020. Tuma nota, si bo petishon ta aprobá bo ta risibí pago den transkurso di e luna di desèmber 2020.
Ken ahinda tin derechi riba Sosten Laboral?
Ta importante pa Ministerio di SOAW sa si entre tantu bo a haña trabou òf si ahinda bo mester di Sosten Labor. Pa esaki SOAW a manda un Whatsapp i e-mail ku algun pregunta (kuestionario) pa tur risipiente di Sosten Laboral. Basá riba bo kontesta, SOAW ta evaluá si ahinda bo tin derechi riba Sosten Laboral. E último kuestionario a sali den luna di òktober 2020. Si bo no a kontestá e kuestionario via di WhatsApp of e-mail, outomátikmente bo no ta risibí Sosten Laboral den forma di pago òf rekargo di Karchi Sosial riba djaluna, 7 di desèmber, próksimo. Tur persona ku kontestá e kuestionario despues di awe por risibí nan pago òf rekargo di Karchi Sosial despues, ku ta den transkurso di e luna di desèmber 2020.
Pago di Sosten Laboral den desèmber
Personanan ku a pèrdè trabou despues di 15 mart 2020 i ku ainda tin derechi riba Sosten Laboral (pasó nan a reakshoná riba mensahe di WhatsApp/e-mail di SOAW di òktober bisando ku ahinda no tin trabou) ta risibí nan pago riba djaluna, 7 di desèmber, próksimo. Tene kuenta ku personanan ku tin un otro kuenta di banko ku no ta Maduro & Curiel’s Bank, lo risibí nan pago despues di 2 òf 3 dia di trabou. Rekargo di Karchi Sosial pa kompra di komestibel ta tuma lugá djaluna, 7 di desèmber, solamente pa personanan ku a pèrdè trabou promé ku 15 di mart i ku ahinda tin derechi riba Sosten Laboral (pasó nan a reakshoná riba e mensahe di WhatsApp/e-mail di SOAW di òktober bisando ku ahinda nan no a haña trabou). Risibidó di ònderstant ta risibí rekargo di nan Karchi Sosial riba djabièrnè 4 i djabièrnè 18 di desèmber 2020.
Informashon korekto
Ministerio di SOAW ta rekordá tur persona ku si nos deskubrí ku bo a duna informashon inkorekto òf bo a retené informashon importante, bo tin ku paga bèk tur loke bo a kobra di más.
Sosten via HelpDesk SOAW
HelpDesk SOAW tei pa resipientenan di Sosten Laboral ku mester di yudansa pa yena e formulario digital. Esaki por sosodé solamente mediante un sita. Por traha bo sita via telefòn na 724-5309, Whatsapp 510-7629 òf mail via sostenemi@fondodisosten.org.
