Notisia

Kompilashon di e apertura di Siman di Kultura 2023 na Landhuis Kenepa – Museo Tula.

WILLEMSTAD – E aktividat a keda organisá pa Ministerio di Enseñansa, Siensia, Kultura i Deporte/Sektor di Kultura i Deporte (ESKD) den koperashon ku Fundashon Museo Tula (FMT). Na yegada kada bishitante a haña un banderita ku mensahe di un di e tres prinsipionan di Tula i tabata tin animashon musikal di sr. Anthony Hooi. E programa ofishal a keda guiá pa e maestro di seremonia sra. Sigviana Francisca.

A kuminsá e aktividat kaminda a tene seremonia di saludo na nos avochinan guiá pa sr. Richinel Ansano i sra. Rose Marie Sling. Despues a sigui ku e programa ofishal, kaminda e hóben Nedeon Sluis a kanta himno siguí pa diskurso di presidente di FMT sr. Shurby Alberto. Na mes momentu FMT a hasi entrega di rapòrt relashoná ku historia di Kòrsou na sra. Nathania Engelhart, sra. Ilka Willems i na Minister sr. Sithree van Heydoorn.

Minister enkargá ku Kultura sr. Sithree van Heydoorn a tene su diskurso i deklará Siman di Kultura habrí di forma ofishal. E djengel di Siman di Kultura a keda presentá pa Dibo Di i Adjatai. Despues a sigui ku apertura di Marshe kreativo, kaminda empresarionan i bolunatrionan a presentá nan produktonan kreativo. Tambe a hasi desvelo di e monumentu: ‘Nos no ke nada mas sino nos Libertat”.

Despues a sigui ku presentashon titulá: “Tula Rebelde inmortal”, di e orador di òrden sra. Susanne Camelia-Römer, sigui pa reflekshon di Profesor sra. Rose Marie Allen, sr. Max Elstak, sra. Jeanira Marshal i sr. Christoffer Rosinda. Tambe durante di e dia a tene vários aktividat manera Maramentu di lensu, Liderazgo, Story teller den hòfi, Baile, Fashion Show Afrikano i paseo den e área di Kenepa. Organisashonnan Kreadansa, Dushi Kòrsou, Kaha di òrgel La Primavera di Rudsel Aniseto i Grupo Baba Awokosé a entrené e públiko ku baile i músika durante di e seremonia ofishal i durante di hinter e dia.

Ministerio di ESKD por mira bèk riba un apertura eksitoso.

*******************************

MAS NOTISIA

Ministerio konserní: Enseñansa, Siensia, Kultura & Deporte