Publiká riba 18 Yüni 2021
WILLEMSTAD – Empleadonan públiko ku ta bin na remarke pa retiru boluntario (VVU) a kuminsá apliká ofisialmente. Despues ku e lei a pasa Parlamento i a keda publiká, aplikashon a start dia 15 di yüni último. Departamentu di Rekurso Humano (HRO) di Gobièrnu di Kòrsou ya a registrá 253 ámtenar ku ke hasi uso di e lei di VVU ougùstùs i sèptèmber 2021.
Ta bai tin momentunan kaminda kada empleado por risibí informashon di su kaso spesífiko, pa e por tuma un bon desishon. Riba dianan 16, 17 i 18 di yüni, Algemeen Pensioenfonds Curaçao (APC) ta duna splikashon na tur interesado.
Unabes ku e empleado yena su formulario di aplikashon, esaki ta keda registrá. Tin un komishon dediká ku ta analisá kada petishon pa wak si e kolega ta bini na remarke sigur i tambe kon e proseso mester kana pa e empleado por tuma retiru boluntario.
Pareu ku e trayekto akí, HRO ta trahando tambe riba desaroyo di e organisashonnan for di kual e empleadonan ta bai sali. Ta hasi vários esfuerso pa por akapará e kambio mas mihó posibel.
Un gradesimentu ta bai na tur kolega i instansianan ku ta trahando inkansabel pa realisá e trayekto akí. Esaki ku e meta final pa duna e koleganan akí terminashon di nan labornan desplegá i alabes gradisí nan pa e labornan ehersé durante e añanan tras di lomba.
