Publiká riba 13 Mei 2020
WILLEMSTAD- Willemstad- Djaluna 27 di aprel di e aña aki a tuma lugá un konferensia virtual di nivel haltu entre ministernan di turismo di Oropa tokante e konsekuensianan di e krísis aktual riba e sektor turístiko di e e diferente paisnan den Union Oropeo. Ku esfuerso di entre otro nos minister di Desaroyo Ekonómiko, sra Giselle Mc William, interesnan di Kòrsou su turismo tambe a keda diskutí den e reunion aki via di e sekretario di estado Hulandes. E reunion aki a keda di presidí pa e representashon Kroata den Union Oropeo.
Sra. Mona Keijzer, Sekretario di Estado Hulandes a partisipá na e reunion aki representando e Ministerio di Asuntunan Ekonómiko i Klima di Hulanda.
Na nòmber di su koleganan minister di islanan Karibense den Reino, nos minister di Desaroyo Ekonómiko, Sra Giselle Mc William a dirigí un karta na sra Keijzer pa tèkel e interes di nos islanan tambe pa haña akseso na e pakete di rekuperashon Oropeo. E pakete di rekuperashon aki ta brinda sosten na paisnan meimei di e krísis aki pa medio di e asina yama EU Global Response.
Ku masha satisfakshon minister Mc William a tuma nota ku durante e presentashon di sra Keijzer den e konferensia, e petishon di parti di nos islanan tambe a keda tratá ku demas miembronan di Union Oropeo.
Den e mesun karta, Minister Mc William, den diálogo ku Minister di Turismo di Aruba a hasi un propuesta tambe pa lansamentu di un plataforma pa interkambio di konosementu i “best practices” den Reino manera ta e kaso kaba den Union Oropeo. E plataforma aki lo mester fungi komo un rèspòns riba un aserkamentu unánime pa ku e konsekuensianan di COVID-19 den e sektor turístiko di tantu Kòrsou, Aruba, St. Maarten komo tambe munisipionan Hulandes den Reino i Hulanda mes.
