Awe nos ta selebrá 35 aña “Dia di Bandera” - Informashon tokante Gobièrnu di Kòrsou Bo opinion

Notisia

Awe nos ta selebrá 35 aña “Dia di Bandera”

Geplaatst op 02 July 2019 dor di Ministerio Enseñansa, Siensia, Kultura & Deporte

Felis Dia di Bandera!

Awe nos ta selebrá 35 aña “Dia di Bandera”. Ta e momento pa selebra nos “memoria kolektivo” I nos Bandera. Nos bandera ta nos símbolo I nos semáforo di union. Esun ku ta simbolisá nos identidat kolektivo! Pero kiko ta identidat? Esaki ta un pregunta difisil pa kontestá!

Identidat ta masha difisil pa deskribí

E tema identidat ta toka nos mente konstantemente: tur kaminda. E ta mishi ku nos tur. Ta nos ta skohe nos identidat of ta sosiedat ta determiná nos identidat?
En todo kaso mi ta hasi un intento di splika kiko ami ta komprondé bou di identidat: identidat ta e lokual ta úniko of inherente na un persona, organisashon of pais. E palabra “identidat” konose diferente forma: p.e. identidat personal, identidat di organisashon o identidat nashonal/kultural. Laga nos limitá nos mes na e identidat nashonal: Kua ta e karakterístikanan di nos identidat?

Tin un identidat kurasoleno? O un identifikashon di un relashon ku Korsou? E ultimo aki ta laga espasio pa Diversidat. E diversidat ku a wòrdu kreá pa “nos historia den moveshon”, ku awe ta forma e korona di TRIUNFO, LOGRO I PERSEVERANSIA rondó di e palu di bandera na Brionplein. E temanan ta separá den tempu, pero ta interkonektá ku den tur sentido di palabra I huntu ta duna nos un identidat komun. Pa medio di e korona aki, nos huntu ta karga un historia ku na diferente momento a pone lus riba algun movementu I suseso impaktmante den nos historia ku awe ta hasi nos e palèt di e Yu di Korsou anno 2019. E korona ta parti di nos identidat kolektivo! Identidat kolektivo o nashonal nos ta konstrui huntu. Pregunta ta: nos ke un identidat konstruktivo/positivo o unu destruktivo/ negativo?

Na e otro banda kon nos ke pa mundu mira nos: esta kua imagen nos ke krea pa mundu? E pregunta aki por yuda nos moldeá nos identidat si nos ke tin un otro imagen: identidat kolektivo no ta algu fiho, pero algu ku ta mutabel. Hasiendo uso di nos rikesa diverso i desendensia múltiple, nos mester por kompronde otro i traha ku otro saliendo for di un meta komun: un Kòrsou próspero kaminda nos por desaroyá na nos máksimo potenshal i biba den harmonía ku otro.

Ta mes un kos ku nos ekipo di futbol ku a sa di saka kara di Kòrsou a lo máksimo den e “Copa di Oro” di Concacaf den kwart final (na Philadelphia), o nos ekipo di Senior League na Puerto Rico ku a marka nos komo e “Baseball Powerhouse” di Karibe, defendiendo e título di Kampeon di Karibe pa 2019 i ku awor ta sigui pa kompetí pa e kopa mundial. O riba tereno kulinario, kon orguyoso nos ta di nos “Curacao Culinary Team” ku a revelá nan talento na Miami resientemente.

Asina tin mas, esaki ta djis un selekshon di e potensia ku Korsou tin. Pabien na tur!! Nan ta un ehèmpel pa no. Ningun miembro di e timnan aki a pone énfasis riba e diferensianan fisiko, étniko i tampoko den idealnan personal, pero a pone enfoke riba un meta komun ku tur ta komparti: kompetí pa gana I riba un plano mas haltu bende Kòrsou komo pais superpotente I ku posibilidatnan legio. Esei ta hasi un grupo, un team, un instituto, un pais eksitoso!!

E palabra magiko ta: #huntu!! Kontrali na un gota di awa ku disparsé den laman ganchu I ta wordu apsobrá kompletamente, laga nos komo Yu di Kòrsou konservá i transformá nos identidat kolektivo i distinguí nos mes di forma konstruktivo i positivo!!
Ban #huntu!!!

Bishita e link aki pa un relato fotográfiko: Facebook Ministerie van Onderwijs, Wetenschap, Cultuur & Sport

 

#DiadiBandera2019. #BanderaKòrsou #Korona #selebrashon #35aña

Ministerio konserní