Awe ta Dia Mundial di Salú - Informashon tokante Gobièrnu di Kòrsou Bo opinion

Notisia

Awe ta Dia Mundial di Salú

Geplaatst op 07 April 2020 dor di Ministerio Salubridat Públiko, Medio Ambiente i Naturalesa

Willemstad – Awe dia 7 di aprel, awor mas ku nunka mundu ta para ketu riba e fecha spesial di awe ku ta Dia Mundial di Salú. Un dia ku e aña aki a kai den un periodo ku mundu kompletu ta den gara di e pandemia di COVID-19. Un dia tambe, ku mundu kompleto ta implementando medidanan drástiko ku e meta pa evitá ku e vírùs ta sigui plama i afektá severamente salú di sentenares di hende. Apesar di esaki nos tur ta lamentá tambe e kantidat grandi di personanan ku a fayesé rònt mundu i p’esei nos mester keda hasi esfuerso pa kuida nos salú pa evitá di keda kontagiá ku e vírùs.

Kòrsou, meskos ku práktikamente tur pais na mundu, tambe tin siudadanonan ku a keda kontagiá ku e vírùs COVID-19. P’esei Gobièrnu di Kòrsou a implementá diferente medida manera: sera negoshinan (ku eksepshon di supermerkadonan), regulashon di uzo di outo, toke de keda, aplikashon di distansha sosial i medidanan sanitario. Tur esaki ku e meta pa kuida nos salú i evitá ku nos ta kontagiá otro i konsekuentemente pone preshon haltu riba nos sistema di salubridat.

Pa kuida nos salú ta hopi importante pa nos tene kuenta ku nos dieta i tene sufisiente sosiegu pa mantené nos sistema inmunológiko na nivel i apliká tur e medidanan ku gobièrnu a implementá. Ku un bon sistema inmunológiko nos kurpa por bringa posibel entrada di e vírùs òf evitá síntomanan severo ku por kondusí na morto. Enfermera i enfermeronan di Kòrsou tambe meresé palabranan di sosten, pa nan apresio pa e trabou i e gran kurashi i balentía di esnan ku mester kuida salú di pashèntnan di COVID-19. 

Ministerio konserní