Publiká riba 04 Desèmber 2018
Un apelashon drástiko:
Ban kore mas responsabel pa un tráfiko mas sigur
Willemstad – Minister di Tráfiko, Transporte i Planifikashon Urbano, Sra. Zita Jesus-Leito ta hasi un apelashon drástiko na komunidat pa ban kore mas responsabel den tráfiko. Komunidat a keda di shòk ku 3 morto den tráfiko den e wikènt tras di lomba. Un palabra di forsa i kondolensia ta bai pa e famianan ku a pèrdè nan sernan kerí.
Desèmber ta e luna ku tin mas tantu aksidente di outo mirando ku ta dianan di fiesta. Tin hende ta bin di afó ku fakansi i hopi suidadano ta hasi kompra, pues tin mas hende riba nos kareteranan. Un apelashon na tur outomobilista, siklista, motosiklista i peaton pa nos tur ban move ku mas koutela den tráfiko. Selebrá i festehá manera bo ta deseá, pero semper na midi.
Ta rekomendabel pa kada outomobilista ehersé un bon komportashon den tráfiko i tene kuenta ku otro:
Na momentu ku bo ta akudí na un òf otro aktividat, hasi uso di e sistema di BOB. Esaki ta enserá ku tin un persona den e grupo ku no ta bebe alkohòl ya e por transportá esnan ku si a usa alkohòl bai hiba kas na un manera responsabel.
Tambe mester kontrolá ku e reibeweis, papel di kùr, seguro, belasting di outo ta na òrdu, i sòru pa e vehíkulo ta den bon kondishon.
Ta di sumo importansha pa komunidat kompleto ta konsiente di un tráfiko sigur. Di parti di gobièrnu di Kòrsou nos ta hasi lo máksimo pa drecha infrastruktura di kaminda i usa esaki pa kalma nos tráfiko i hasié mas sigur. Señora Zita Jesus-Leito komo Minister di Tráfiko ta spera ku nos tur por usa nos sentido síviko i asina yuda alsa e seguridat den tráfiko.
